ევროპის საბჭოს საპარლამენტო ასამბლეაზე (PACE) რუსეთისთვის უფლებამოსილების არცნობის საკითხი დააყენეს. აღნიშნული ინიციატივით ასამბლეის ზამთრის სესიის პირველ სხდომაზე უკრაინის დელეგაციის ხელმძღვანელი, მარია მეზენცევი გამოვიდა.

მეზენცევას თქმით, რუსეთი აგრძელებს ადამიანის უფლებების უგულებელყოფას, მათ შორის ოკუპირებულ ტერიტორიებზე. უფლებამოსილების გასაჩივრებას მხარი 38 დელეგატმა დაუჭირა, წინააღმდეგი იყო 61, ხოლო 51-მა თავი შეიკავა. აღნიშნულ ინიციატივას მხარი დაუჭირა საქართველოს დელეგაციამაც.

ორგანიზაციის რეგლამენტის თანახმად, სესიის პირველ დღეს დელეგაციების უფლებამოსილებები ავტომატურად მტკიცდება, თუ რომელიც წევრის მხრიდან წინააღმდეგობა არაა. უფლებამოსილების გასაჩირებისთვის საკითხს მხარი სულ მცირე ხუთი დელეგაციის 30-მა წარმომადგენელმა უნდა დაუჭიროს მხარი.

იმის გამო, რომ ასამბლეის წევრების უმრავლესობამ ინიციატივის წინააღმდეგი იყო, რუსეთის საკითხი ორ დღეში დებატების შემდეგ გადაწყდება. ამ ხნის განმავლობაში მას უფლება აქვს ყველა განხილვაში მიიღოს მონაწილეობა, გარდა იმ საკითხებისა, რომელიც უშუალოდ მას ეხება.

PACE-ს სესიის სხდომა 25-28 იანვარს გაიმართება. აღნიშნულ სხდომაზე საქართველოსთან დაკავშირებით ორ დოკუმენტს განიხილავენ. პირველი არის ანგარიში სადამკვირვებლო მისიის 31 ოქტომბრის არჩევნებთან დაკავშირებით. ხოლო მეორე არის მონიტორნგის ანგარიში ქვეყანაში მიმდინარე მოვლენებზე.

2019 წლის ზაფხულში ევროსაბჭოს საპარლამენტო ასამბლეამ მიიღო რეზოლუცია, რომელიც რუსეთს ასამბლეაში დაბრუნების საშუალებას აძლევს. ასამბლეის სხდომაზე მიღებულმა რეზოლუციამ ცვლილებები შეიტანა PACE-ს რეგლამენტშიც, რომელიც კრძალავს ევროსაბჭოს დელეგაციებისთვის ხმის და ასამბლეაში გამოსვლის უფლების ჩამორთმევას.

ყირიმის ანექსიის გამო PACE-მ 2014 წელს რუსეთს ხმის მიცემის უფლება ჩამოართვა. ერთი წლის შემდეგ ორგანიზაციამ სანქციები გაახანგრძლივა, რის გამოც რუსეთმა ასამბლეის სესიებში მონაწილეობაზე უარი განაცხადა. გარდა ამისა, 2017 წლიდან რუსეთმა ევროსაბჭოს ბიუჯეტში საწევრო შენატანის გაკეთება შეწყვიტა.

ხმის უფლების ჩამორთმევის გარდა რუსებს არ შეეძლოთ PACE-ში მომხსენებლობა, სხვა ქვეყნებში არჩევნებზე დამკვირვებლობა და საერთაშორისო ორგანიზაციებში ასამბლეას წარდგენა. ამასთანავე, მათ PACE-ში წამყვანი პოზიციების დაკავება ეკრძალებოდათთ.