ერთიანი ნაციონალური მოძრაობის მმართველობის დროს აქტიური ოპოზიციონერი, გია გაჩეჩილაძე ამბობს, რომ 2008 წლის იანვარში ენმ-ს წინააღმდეგ გამართული ერთ-ერთი ყველაზე მასშტაბური აქცია, მიხეილ სააკაშვილსა და მის გუნდთან შეთანხმების შედეგად დაშალა. გაჩეჩილაძემ ამის შესახებ პალიტრანიუსის ეთერში განაცხადა.

"მომინახეს მეგობარი, რომლესაც დაარეკინეს ჩემთან და რომელმაც ძალიან მთხოვა, რომ ავსულიყავი შავნაბადაზე სააკაშვილთან შესახვედრად. ავედით სააკაშვილთან მე და ბიძინა გეგიძე. როცა ავედით, ისხდნენ სააკაშვილი, გივი თარგამაძე, ნიკა რურუა და ა.შ. მთხოვდა, ოღონდ, ახლა შენ გაჩერდიო, პირდაპირ სიტყვებს მის გეუბნები, მეტს აღარ ვიზამო, რაც მოხდა, მასეთი აღარ ვიქნებიო. მე ვუთხარი, არ გიჯერებ-მეთქი, მომეცი მთელ საქართველოზე სიხშირე, ტელევიზია გამაკეთებინე-მეთქი. კი, ბატონოო, წაიღეო, როგორც კი ეს ამბავი დასრულდებაო. უბრალოდ, კენია ხომ არ ვართო, მილიონი სტუმარი ჩამოდის ინაუგურაციაზეო, ავტეხოთ ახლა სისხლისღვრა, ხომ იცი, შეგვიძლიაო და ისეო, რომ თან არავინ გააშუქებსო ხვალ რა მოხდებაო. კარგი, მომეცი-მეთქი სიხშირე, სხვა რა გზა მქონდა. გამორიცხული იყო, რომ ის ხალხი სისხლის ღვრაზე წამეყვანა და წაგვეყვანა. ინაუგურაცია ჩაატარა თუ არა, გადამაგდო მეორე დღესვე", — განაცხადა გაჩეჩილაძემ პალიტრანიუსის ეთერში.

2008 წელს გამართული საპრეზიდენტო არჩევნების შედეგებს პროტესტი მოჰყვა. არჩევნების შედეგებით უკმაყოფილო ადამიანები თბილისში, იპოდრომის ტერიტორიაზე შეიკრიბნენ. მოსახლეობა და პოლიტიკოსები ცესკოს მიერ გამოქვეყნებული არჩევნების შედეგებს არ აღიარებდნენ და გია გაჩეჩილაძის ძმა, ლევან გაჩეჩილაძესა და მიხილ სააკაშვილს შორის მეორე ტურის გამართვას ითხოვდნენ.