გირჩი — მეტი თავისუფლების ლიდერი, ზურაბ ჯაფარიძე უპერსპექტივოს უწოდებს იდეას იმის შესახებ, რომ 2021 წლის ადგილობრივი თვითმმართველობის არჩევნები განხილული იყოს როგორც პლებისციტი და მისი შედეგების შესაბამისად დაინიშნოს, ან არ დაინიშნოს ვადამდელი არჩევნები.

იდეა, რომელსაც ბოლო პერიოდში აქტიურად ლობირებენ ჯაფარიძის ყოფილი თანაპარტიელები გირჩიდან და მოქალაქეების ლიდერები გულისხმობს, რომ თუ თვითმმართველობის არჩევნებში ოპოზიცია გაიმარჯვებს, უნდა ჩატარდეს ვადამდელი საპარლამენტო არჩევნები, თუ მმართველი პარტია — ვადამდელი საპარლამენტო არჩევნების ჩატარებას აზრიც ეკარგება.

"არანაირი პერსპექტივა არ აქვს, ჩემი აზრით მაგ შეთავაზებას და ეს ისედაც ნათელია. პერსპექტივა იმისი, რომ მაგაზე ოცნება წამოვიდეს, მაგის ალბათობა არის პრაქტიკულად ნულის ტოლი, ისევე როგორც ის, რომ შიგნით, ოპოზიციის შეთანხმება მოხდეს მაგაზე, ასევე არის ნულის ტოლი [...]

შეიძლება ვიღაცის გადმოსახედიდან იყოს კარგი იდეა და კომპრომისული ვერსია, მაგრამ, ერთი, რომ მოლაპარაკების მაგიდასთან ეგ ინიციატივა არ გაჟღერებულა, მეორე — ჩემი აზრით, არის სრულიად უპერსპექტივო", — განაცხადა ზურაბ ჯაფარიძემ პალიტრანიუსის ეთერში.

14 იანვარს პარტია მოქალაქეებსა და გირჩს შორის ცალკე კონსულტაცია გაიმართა. პარტიების ლიდერებმა, ალეკო ელისაშვილმა და იაგო ხვიჩიამ შეხვედრის დაწყებამდე განაცხადეს, მათი შეთავაზებაა, რომ რიგგარეშე არჩევნები იმ შემთხვევაში მოითხოვონ, თუ თვითმმართველობის არჩევნებში ქართული ოცნება დამარცხდება.

ამასთან დაკავშირებით გიგა ბოკერიამ განაცხადა, რომ პლებისციტის გარდა არსებული პოლიტიკური კრიზისის განმუხტვის მიზნით განხორციელებული სხვა ნაბიჯები მიმართულია იმისთვის, რომ მოახდინოს პოლიტიკური ოპოზიციური კლასის დემორალიზაცია.

• ვაპირებ, დაველაპარაკო ევროპული საქართველოს წევრებს, რომლებიც პარლამენტში შევიდნენ და არა მენეჯმენტს — მეგრელიშვილი

საქართველოში 31 ოქტომბერს საპარლამენტო არჩევნები ჩატარდა. პირველი ტური ცხრა პარტიამ გადალახა. მათგან, 8 ოპოზიციურმა ძალამ არჩევნების შედეგები ლეგიტიმურად არ სცნო, მეორე ტურში მონაწილეობა არ მიიღო და მანდატების გაუქმება მოითხოვა. სადეპუტატო უფლებამოსილების შეწყვეტის შესახებ პარლამენტს გირჩისა და მოქალაქეების გარდა ყველა პარტიამ მიმართა. მათ შორის, გირჩი — მეტი თავისუფლების ლიდერმა, ზურაბ ჯაფარიძემაც.

სადეპუტატო უფლებამოსილება ვადამდე შეუწყდა პატრიოტთა ალიანსის 3 წევრს — ირმა ინაშვილს, გიორგი ლომიასა და გოჩა თევდორაძეს. პატრიოტთა ალიანსის სიით მათ ნაცვლად პარლამენტში შევიდნენ დავით ზილფიმიანი, ფრიდონ ინჯია და გელა მიქაძე. პარლამენტში შესვლასთან ერთად მათ პარტია დატოვეს და ახალი პოლიტიკური ძალა — ევროპელი სოციალისტები დააფუძნეს.