"თბილისობის" დღესასწაული წელს 20-21 სექტემბერს გაიმართება. ამის შესახებ თბილისის მერმა კახა კალაძემ მუნიციპალიტეტის მთავრობის სხდომაზე განაცხადა.

მისი თქმით, გარდა სხვადასხვა აქტივობისა და ღონისძიებისა, 20 სექტემბერს საპატიო თბილისელების დაჯილდოების ცერემონია, ხოლო 21 სექტემბერს საზეიმო კონცერტი ჩატარდება.

აღსანიშნავია, რომ "თბილისობის" დღესასწაული ბოლო წლებში სექტემბრის ბოლოს ან ოქტომბრის დასაწყისში იმართებოდა, წელს კი თარიღის შეცვლა კალაძის თქმით, 4 ოქტომბერს დაგეგმილი არჩევნების გამო მოუწიათ.

"იმის გამო, რომ წელს, 4 ოქტომბერს არის თვითმმართველობის არჩევნები, "თბილისობა“ 20-21 სექტემბერს ჩატარდება. ღონისძიების მთავარი ლოკაციები კვლავ ორბელიანის მოედანი და რიყის პარკი იქნება, სადაც ორი დღის განმავლობაში, სტუმრებს მრავალფეროვანი პროგრამა დახვდებათ. 20 სექტემბერს, სახელმწიფო ცერემონიების სასახლეში ტრადიციულად საპატიო თბილისელების დაჯილდოების ცერემონია გაიმართება, რომელიც სატელევიზიო ეთერით გადაიცემა, ხოლო 21 სექტემბერს, ევროპის მოედანზე საზეიმო კონცერტი ჩატარდება.

რაც შეეხება დანარჩენ ღონისძიებებს, ორივე დღეს, ორბელიანის მოედანზე წარმოდგენილი იქნება გამოფენები, თეატრალიზებული, გასართობი თუ საბავშვო პროგრამები; აბანოთუბანში 20-21 სექტემბერს ჩატარდება გამოფენა-გაყიდვა "თბილისური მრავალფეროვნება", ხოლო რიყის პარკში მისულ სტუმრებს დახვდებათ საბავშვო წარმოდგენები და ქართული ესტრადის შემსრულებლების მონაწილეობით საზეიმო კონცერტი. 21 სექტემბერს, 20:00 საათზე კი, ევროპის მოედანზე, როგორც უკვე გითხარით, დაიწყება "თბილისობის" საზეიმო კონცერტი", — თქვა კალაძემ.

მისივე ცნობით, ღონისძიებების შესახებ დეტალურ ინფორმაციას მუნიციპალიტეტი უახლოეს დღეებში გაავრცელებს.

ცნობისთვის, "თბილისობის" დღესასწაულისთვის მერია გამარტივებული შესყიდვით 3 439 500 ლარის დახარჯვას გეგმავს. ოცნების პრემიერმა ირაკლი კობახიძემ განკარგულებას ხელი უკვე მოაწერა.