NATO-ს გენერალურმა მდივანი, მარკ რუტე ეხმაურება რუსეთის მიერ პოლონეთის საჰაერო სივრცის დარღვევას და განაცხადა, რომ "მოკავშირეები მზად არიან დაიცვან NATO-ს ტერიტორიის ყოველი სანტიმეტრი". რუტემ ასევე ისაუბარა NATO-ს ხელშეკრულების მე-4 მუხლი ამოქმედებაზე და განაცხადა, რომ "ჯერ ინციდენტის სრულმასშტაბიანი შეფასება მიმდინარეობს".

განცხადების ბოლოს NATO-ს გენერალურმა მდივანმა ხაზი გაუსვა, რომ ისინი კვლავ გააგრძელებენ უკრაინის დაცვას, რადგან მისი უსაფრთხოება მჭიდროდ არის გადაჯაჭვული ყველას კეთილდღეობასთან.

"გუშინ ღამით რუსეთიდან პოლონეთის საჰაერო სივრცეში დრონები შეიჭრა. ჩვენი საჰაერო თავდაცვის სისტემა გააქტიურდა და წარმატებით უზრუნველყო NATO-ს ტერიტორიის დაცვა, როგორც ამას მისი დანიშნულება ითვალისწინებს. პროცესში ჩართულნი იყვნენ რამდენიმე მოკავშირეები: პოლონეთის F16-ები, ნიდერლანდების F35-ები, იტალიის "AWACS"-ები, NATO-ს მრავალფუნქციური საწვავის შემვსები სატრანსპორტო საშუალებები და გერმანიის "Patriot"-ები. მე ვაფასებ მფრინავებს და ყველა იმ ადამიანს, ვინც სწრაფად და პროფესიონალურად მოახდინა რეაგირება.

ჩრდილოატლანტიკურმა საბჭომ დღეს დილით განიხილა ვითარება, პოლონეთის თხოვნით, ვაშინგტონის ხელშეკრულების მე-4 მუხლის საფუძველზე გამართულ კონსულტაციებზე. მოკავშირეებმა გამოხატეს სოლიდარობა პოლონეთთან და დაგმეს რუსეთის უპასუხისმგებლო ქცევა. ინციდენტის სრულმასშტაბიანი შეფასება ჯერ კიდევ მიმდინარეობს. თუმცა ცხადია, რომ ეს დარღვევა გამონაკლისი შემთხვევა არ არის.

უმაღლესი მთავარი სარდალი გააგრძელებს ჩვენი შეკავებისა და თავდაცვის მდგომარეობის აქტიურ მართვას მთელ აღმოსავლეთ ფლანგზე. მოკავშირეები მზად არიან დაიცვან NATO-ს ტერიტორიის ყოველი სანტიმეტრი. ჩვენ ყურადღებით ვაკვირდებით ვითარებას აღმოსავლეთ ფლანგზე, ჩვენი საჰაერო თავდაცვა კი მუდმივად მზადყოფნაშია.

ეს კიდევ ერთხელ უსვამს ხაზს NATO-ს მნიშვნელობასა და იმ გზას, რომელზეც მოკავშირეები შეთანხმდნენ წლეულს ჰააგაში გამართულ სამიტზე. საჭიროა მეტი ინვესტიცია თავდაცვაში, თავდაცვის წარმოების გაძლიერება, რათა გვქონდეს საკმარისი რესურსი თავდაცვისთვის. აგრეთვე უნდა გავაგრძელოთ უკრაინის მხარდაჭერა, რადგან მისი უსაფრთხოება მჭიდროდ არის გადაჯაჭვული ჩვენთან.

დასასრულს ვიტყვი, რომ რუსეთი აწარმოებს სახიფათო აგრესიულ ომს უკრაინის წინააღმდეგ, რომელიც მიზანმიმართულად აზიანებს მშვიდობიან მოსახლეობასა და სამოქალაქო ინფრასტრუქტურას. მოკავშირეები მზად არიან გააძლიერონ მხარდაჭერა უკრაინისთვის რუსეთის ესკალაციის ფონზე," — განაცხადა რუტემ.

რუტეს განცხადებას, NATO-ში აშშ-ის ელჩი მეთიუ უიტეკერიც გამოეხმაურა X-ზე: "ჩვენ ვდგავართ NATO-ს მოკავშირეებთან ერთად საჰაერო სივრცის დარღვევის წინაშე და დავიცავთ NATO-ს ტერიტორიის თითოეულ სანტიმეტრს".

შეგახსენებთ, მას შემდეგ, რაც პოლონეთის სამხედრო ძალებმა საკუთარი საჰაერო სივრცეში შეჭრილი რამდენიმე რუსული დრონი ჩამოაგდეს, ვარშავამ NATO-ს ხელშეკრულების მე-4 მუხლი აამოქმედა, რათა მოკავშირეებთან კონსულტაციები გამართოს.

ცნობისთვის, პოლონეთის არმიის ოპერატიული სარდლობის განცხადებით, რუსეთის მიერ უკრაინაზე განხორციელებული თავდასხმის შედეგად, რუსეთმა პოლონეთის საჰაერო სივრცე უპრეცედენტოდ დაარღვია. სარდლობის მიერ გავრცელებულ განცხადებაში აღნიშნულია, რომ რამდენიმე საფრთხის შემცველი დრონი ჩამოაგდეს. ბოლო ინფორმაციით, პოლონეთმა მათ საჰაერო სივრცეში შესული 19 დრონიდან 4 ჩამოაგდო.