"რადიო მარნეულის" ინფორმაციით, "ქართულმა ოცნებამ" დმანისის მუნიციპალიტეტის კარაბულახის თემის მაჟორიტარ კანდიდატად გამლეტ ისმაილოვი წარადგინა. სამოქალაქო აქტივისტ სამირა ბაირამოვას თქმით, ისამილოვი იმ სკოლის დირექტორია, სადაც 14 წლის მოკლული გოგო, აითაჯ შახმაროვა სწავლობდა.

"გახსოვთ 14 წლის აითაჯის სასტიკი მკვლელობა?

ამ სკოლის დირექტორი აითაჯის დედასთან ერთად აორგანიზებდა ნიშნობას და ერთად მალავდნენ.

ამ სკოლის დირექტორი, ჰამლეტ ისმაილოვი, პედოფილია, რომელმაც თავისი არასრულწლოვანი მოსწავლე ცოლად მოიყვანა. სწორედ ამიტომ აღიძრა სისხლის სამართლის საქმეც.

13 წლის აითაჯი მასზე 13 წლით უფროსმა კაცმა მოიტაცა და შემდეგ მაშინ მოკლა, როცა არასრულწლოვანი გოგო მისგან გაქცევას ცდილობდა", — წერს სამირა ბაირამოვა.

სამოქალაქო აქტივისტ სამირა ბაირამოვას ინფორმაციით, ზემო ყარაბულახის სკოლის ადმინისტრაცია, პედაგოგები და სკოლის დირექტორი, ჰამლეტ ისმაილოვი, აითაჯის ნიშნობის შესახებ ინფორმირებულნი იყვნენ. სამირა ბაირამოვა იმასაც წერდა, რომ 2015 წელს, თავად ჰამლეტ ისმაილოვი დაინიშნა არასრულწლოვან, 15 წლის სკოლის მოსწავლეზე და მოგვიანებით მათ იქორწინეს კიდეც, რის შესახებაც ინფორმირებული იყო შინაგან საქმეთა სამინისტროც.

რადიო "მარნეულს" დმანისში ოცნების მაჟორიტარი კანდიდატის სახელით სასამართლოში ჩივილით მას შემდეგ დაემუქრნენ, რაც რადიო "მარნეულმა" სამირა ბაირამოვას მიმართვა სოციალურ ქსელში გააზიარა.

"რადიო "მარნეულმა" სამირა ბაირამოვას მიმართვა სოციალურ ქსელში გააზიარა, რის შემდეგაც რედაქციას დაურეკა პირმა, რომელმაც ვინაობის გამხელა არ ისურვა, გაგვეცნო როგორც გამლეტ ისმაილოვის მეგობარი, გვესაუბრა ქართულ ენაზე, მოგვთხოვა, რომ პოსტი წაგვეშალა და სასმართლოში ჩივილით დაგვემუქრა. ამავე პირმა დარეკა რადიო "მარნეულის" სხვა ჟურნალისტთანაც, საუბარი დაიწყო აზერბაიჯანულ ენაზე, ქართულად კითხვის დასმის შემდეგ გვითხრა, რომ ქართული არ იცოდა, საუბრის ქართულად გაგრძელებისას კი კვლავ გამართული ქართულით გვითხრა, რომ სასამართლოში გვიჩივლებდა და მობილური გათიშა", — წერს რადიო მარნეული.