გირჩის ერთ-ერთი ლიდერის, ვახტანგ მეგრელიშვილის განცხადებით, იგი ევროპული საქართველოს იმ წევრებთან განიხილავს მოლაპარაკებებს, ვინც პარლამენტში შევიდა და არა მენეჯმენტთან. ამის შესახებ მან პალიტრანიუსის გადაცემა რეზიუმეში განაცხადა.

"მე არ მჯერა ასეთი ინფანტილური სისულელეების, რომელიც, იდეაში, ისეთი ჯგუფებისგან უფრო ისმის ხოლმე, რომელსაც თავიდანვე ეტყობა, რომ ამ მოლაპარაკებების წარმატების სურვილი არ აქვს. გზაში, თქვენთან რომ მოვდიოდი, ვუსმენდი გიგა ბოკერიას და მას განსაკუთრებულად ეტყობა მოლაპარაკებების მიმართ ეს დამოკიდებულება, რაც, მგონია, რომ არაპრაგმატულია ისედაც დამარცხებული პარტიისთვის და რომელსაც ახლა შეიძლება დაბრალდეს კონსტრუქციული პროცესის ჩაშლა. ამაზე სრულ პასუხისმგებლობას აიღებს ევროპული საქართველო. მე ვაპირებ, რომ დაველაპარაკო ევროპული საქართველოს კონკრეტულ წევრებს, რომლებიც პარლამენტში გავიდნენ და არა ევროპული საქართველოს მენეჯმენტს. იმათი აზრი არც კი ვიცი, როგორც ჩანს, ადამიანებად არ თვლიან, ვგულისხმობ ტარიელ ნაკაიძეს, არმაზ ახვლედიანს", — განაცხადა მეგრელიშვილმა.

გიგა ბოკერიამ დღეს განაცხადა, რომ პლებისციტის გარდა არსებული პოლიტიკური კრიზისის განმუხტვის მიზნით განხორციელებული სხვა ნაბიჯები მიმართულია იმისთვის, რომ მოახდინოს პოლიტიკური ოპოზიციური კლასის დემორალიზაცია.

დღეს პარტია მოქალაქეებსა და გირჩს შორის ცალკე კონსულტაცია გაიმართა. პარტიების ლიდერებმა, ალეკო ელისაშვილმა და იაგო ხვიჩიამ შეხვედრის დაწყებამდე განაცხადეს, მათი შეთავაზებაა, რომ რიგგარეშე არჩევნები იმ შემთხვევაში მოითხოვონ, თუ თვითმმართველობის არჩევნებში ქართული ოცნება დამარცხდება.

საქართველოში 31 ოქტომბერს საპარლამენტო არჩევნები ჩატარდა. პირველი ტური ცხრა პარტიამ გადალახა. მათგან, 8 ოპოზიციურმა ძალამ არჩევნების შედეგები ლეგიტიმურად არ სცნო, მეორე ტურში მონაწილეობა არ მიიღო და მანდატების გაუქმება მოითხოვა. სადეპუტატო უფლებამოსილების შეწყვეტის შესახებ პარლამენტს გირჩისა და მოქალაქეების გარდა ყველა პარტიამ მიმართა. მათ შორის, გირჩი — მეტი თავისუფლების ლიდერმა, ზურაბ ჯაფარიძემაც.

სადეპუტატო უფლებამოსილება ვადამდე შეუწყდა პატრიოტთა ალიანსის 3 წევრს — ირმა ინაშვილს, გიორგი ლომიასა და გოჩა თევდორაძეს. პატრიოტთა ალიანსის სიით მათ ნაცვლად პარლამენტში შევიდნენ დავით ზილფიმიანი, ფრიდონ ინჯია და გელა მიქაძე. პარლამენტში შესვლასთან ერთად მათ პარტია დატოვეს და ახალი პოლიტიკური ძალა — ევროპელი სოციალისტები დააფუძნეს.