შვედეთის საგარეო საქმეთა სამინისტრო საქართველოს თვითმმართველობის არჩევნებზე ქართული ოცნების მიერ ეუთო/ოდირის მოწვევის დაგვიანების შესახებ X-ზე წერს. განცხადებაში აღნიშნულია, რომ საქართველოს კანონმდებლობაში ბოლო ცვლილებები საფრთხეს უქმნის არჩევნების მთლიანობას. შვედეთის საგარეო უწყება, ასევე მოუწოდებს მთავრობას შეასრულოს ეუთოს საარჩევნო რეკომენდაციები.

"სამწუხაროა, რომ საქართველოს მოახლოებულ ადგილობრივ არჩევნებზე ეუთო/ოდირის სრულფასოვანი დაკვირვების შესაძლებლობისთვის დროული მოწვევა არ გაიცა. საქართველოს საარჩევნო კანონმდებლობაში ბოლო ცვლილებები საფრთხეს უქმნის არჩევნების მთლიანობას. იმავდროულად, გრძელდება რეპრესიები სამოქალაქო საზოგადოების და ოპოზიციის წინააღმდეგ.

საქართველოს ხელისუფლებამ უნდა აღადგინოს ნდობა დემოკრატიული ინსტიტუტების მიმართ, მათ შორის ეუთოს საარჩევნო რეკომენდაციების შესრულებით", — წერია საელჩოს მიერ გავრცელებულ განცხადებაში.

ცნობისთვის, ეუთო/ოდირი თვითმმართველობის არჩევნებს არ დააკვირდება. ODIHR-ის განცხადებაში ვკითხულობთ, რომ "გამჭვირვალე და სანდო საარჩევნო მონიტორინგს საფუძვლიანი მზადება სჭირდება", რაც ქართული ოცნების მოკლე ვადაში გაგზავნილი მოწვევის გამო ვერ მოხერხდება.