ევროპარლამენტში დღევანდელ ყოველწლიურ მოხსენებაში — "კავშირის მდგომარეობის შესახებ" — ევროპის კომისიის პრეზიდენტმა ურსულა ფონ დერ ლაიენმა კიდევ ერთხელ აღნიშნა, რომ დასავლეთ ბალკანეთის, უკრაინისა და მოლდოვას მომავალი ევროკავშირშია. მას ამ კონტექსტში საქართველო არ უხსენებია.

"პატივცემულო წევრებო, როდესაც ვსაუბრობთ დამოუკიდებლობაზე, ვგულისხმობთ ჩვენი ბედის არჩევას. სწორედ ამისთვის იბრძვის უკრაინა. და სწორედ ამას იმსახურებს ყველა ევროპელი. რადგან ევროპა იდეაა — თავისუფლებისა და ურთიერთდახმარების ძალის იდეა. ეს იყო იდეა, რომელიც 1989 წლის შემდეგ თაობას ამოძრავებდა, როცა აღმოსავლეთმა და დასავლეთმა ერთიანობა მოიპოვა. და ის ახლა ისეთივე ძლიერია, როგორიც მაშინ იყო. სწორედ ამიტომ ვუახლოებთ მომავალ წევრ სახელმწიფოებს ჩვენს კავშირს [...] უფრო დიდი და ძლიერი კავშირი ყველასთვის უსაფრთხოების გარანტიაა. და რადგან უკრაინისთვის, მოლდოვისთვის, დასავლეთ ბალკანეთისთვის — მათი მომავალი ჩვენს კავშირშია. მოდით, ევროპის შემდეგი გაერთიანება რეალობად ვაქციოთ ", — აღნიშნა ფონ დერ ლაიენმა.