ოცნების პარლამენტის ვიცესპიკერი გია ვოლსკი ამბობს, რომ გუშინ, 3 სექტემბერს ქართული ოცნების წევრის, ყოფილი პარლამენტარის, ბექა ოდიშარიას მიერ მოქალაქეებისა და ჟურნალისტების გინებას "ვერ დაგმობს".

"ჩვენმა ე.წ. ოპონენტებმა წესად შემოიღეს, რომ უნდა აგინო ადამიანს, დაწყევლო, უნდა უთხრა, რომ იგი მალე მოკვდება, უკიდურესი მძიმე სიტყვები უნდა გამოიყენო. მით უმეტეს, გოგონები არიან სპეციალურად ამისთვის ორგანიზებული და არავინ არაფერი პასუხი არ უნდა გასცეს. ასეთ ვითარებაში ადამიანი შეიძლება გამოვიდეს მწყობრიდან და პასუხი გასცეს და ამას ჰქონდა ადგილი. ეს არ არის ემოციური გამოვლინება, ეს არის განზრახ დაგეგმილი ქმედებები, რომელიც ემსახურება კონკრეტულ მიზანს, რომ შექმნან ატმოსფერო, სადაც ფასეულობა აღარ არსებობს, არც ტრადიცია, არც გულწრფელობა. აბსოლუტური უცოდინარობა და ათ-სართულიანი გინების ცოდნა არის განზრახ დაგეგმილი ბოროტება საქართველოს წინააღმდეგ. ეს ვიხილეთ გუშინ.

მე ვერ დავგმობ ბექა ოდიშარიას გინებას, იმიტომ რომ ადამიანის ფსიქიკაზე მოქმედებს, როდესაც ათი მოლაპარაკე ტურა შემოგესევა და ასეთი ინტენსიური ბულინგით, უკანასკნელი სიტყვებით აგინებენ შენს ოჯახს, შენი ოჯახის წევრებს, გარდაცვლილებს, ცოცხლებს, ბავშვებს, უფროსებს. შეიძლება ასეთ ვითარებაში ადამიანმა თავი ვერ შეიკავოს. რასაკვირველია, თავი უნდა შეიკავოს ბექამაც, მეც, ყველამ, მაგრამ ხანდახან ეს რთულია", — განაცხადა გია ვოლსკიმ.

3 სექტემბერს, მელიქიშვილის გამზირზე, სასტუმრო "საქართველოში" კახა კალაძის საარჩევნო შტაბის გახსნაზე, სადაც მოქალაქეები აქციას მართავდნენ, "ოცნების" წევრი ბექა ოდიშარიაც იმყოფებოდა. აქციის მონაწილეებმა ის ადგილიდან "მონას" სკანდირებით გააცილეს, სავარაუდოდ, წყალი შეასხეს და კვერცხი ესროლეს. სანამ პოლიცია ოდიშარიას ტერიტორიიდან განრიდებას ცდილობდა, მან შეკრებილებს, მათ შორის ჟურნალისტებს, სიტყვიერი შეურაცხყოფა მიაყენა და აგინა.