დიდებული სპორტული უქმე დღეები გამოვიდა: ფეხბურთსა და კალათბურთში, 1 დღეში 2 გამარჯვება მოვიპოვეთ. მოვიგეთ დამაჯერებლად, დამსახურებულად და მოგვეცა ფიქრისა და იმედის საფუძველი. მაგრამ, ჩვენ კიდევ მეტი შეგვიძლია. ეს გამარჯვებისკენ მიმართული ჟინია: პროგრესისკენ მიმართული ენერგია, რომელსაც, ბოლოს, ყოველთვისგამარჯვება მოაქვს.

თურქეთთან 2:3 დასანანი მარცხის შემდეგ, ჩვენმა ფეხბურთელებმა ძალების აღდგენა და ახალი მატჩისთვის მობილიზება შესანიშნავად შეძლეს. სექტემბრის მატჩებში, ყველაზე სასურველ სცენარში, მინიმუმ 4 ქულას ველოდით. ამ მიზნამდე, მცირედი დაგვაკლდა, თუმცა წინ კიდევ 4 თამაში გველოდება.

ბულგარეთთან მატჩი

ბულგარეთის ნაკრებს ესპანეთთან ანგარიშით 0:3 ჰქონდა წაგებული და გუნდის მთავარი მწვრთნელი, ილიან ილიევი, პირველი ქულის აღებას თბილისში გეგმავდა. ჩვენს მეტოქეს გათვლა სწრაფ გოლის გატანაზე ჰქონდა, მაღალ პრესინგსაც გვეთამაშებოდა და აქტიურად გვიტევდა. გამორჩეული მომენტი იყო მე-4 წუთზე, როდესაც გიორგი მამარდაშვილმა ბრწყინვალე, აუღებელი სეივი ჩაატარა (მატჩის დასრულების შემდეგ, ორივე ნაკრების მწვრთნელმა დაადასტურა, რომ ამ მომენტს ბევრი რამის შეცვლა შეეძლო).

ამის შემდეგ, უპირატესობას საქართველოს ნაკრები დაეუფლა. კიტეიშვილისა და ჩაკვეტაძის არყოფნისას, ნახევარდაცვის ხაზი გიორგი ქოჩორაშვილმა, ანრი მექვაბიშვილმა და ნიკა გაგნიძემ დააკომპლექტეს და სასიამოვნო იყო იმის ხილვა, თუ რამდენად კარგად თამაშობდა ჩვენი ნაკრები, როგორც პოზიციურად, ისე ტრანზიციებში: დამაბნეველი მოძრაობებისა და მეტოქის ზურგსუკან ჩარბენების შედეგად, ბულგარელი ფეხბურთელები იძულებულნი იყვნენ სივრცეები შეექმნათ, რითიც ჩვენი ფლანგელი შემტევები, ხვიჩა კვარაცხელია და ზურიკო დავითაშვილი სარგებლობდნენ, რადგან მათთან ბურთის მიტანას ნახევარმცველები მოკლე, იოლად დასამუშავებელი პასით ახერხებდნენ. შესაბამისად, ჩვენი შეტევები უფრო სახიფათო იყო.

ბრწყინვალე მატჩი ჩაატარა ხვიჩა კვარაცხელიამ, ~ნამდვილი კვარა-შოუ შემოგვთავაზა. ბულგარელმა ფეხბურთელებმა პარი სენ-ჟერმენის შემტევის ამოუცნობ მოძრაობებს ვერაფერი გაუგეს და მის შესაჩერებლად უხეშად მოქმედებდნენ, რაც ბულგარეთს რამდენიმე ყვითელი ბარათის ფასი დაუჯდა.

თავსხმა წვიმაში, დინამო არენაზე შეკრებილმა გულშემატკივრებმა 3 უპასუხო გოლი ნახეს: მეტოქის შეცდომით ხვიჩა კვარაცხელიამ ისარგებლა, შემდეგ ზურიკო დავითაშვილის ბრწყინვალე პასით ნიკა გაგნიძემ სადებიუტო გოლი გაიტანა, მეორე ტაიმში კი გიორგი მიქაუტაძემშეაგდო ბურთი მეტოქის კარში (მიყვარს, მიყვარს ბომბარდირი—ამღერდა სტადიონი).

მსოფლიო ჩემპიონატზე გასვლის შანსები

სიტყვა შანსს როდესაც ვახსენებთ, უკვე შესაძლებლობაზე ვსაუბრობთ. შანსი ჰქონდა საქართველოს საფეხბურთო ნაკრებს საბერძნეთთან ფინალში, შემდეგ პორტუგალიასთან და ა.შ. გავიმარჯვეთ და ეს სიხარული ერთად ვიზეიმეთ. სულ ახლახან, შანსი ჰქონდა კალათბურთის ნაკრებს ოლიმპიადის ვიცე-ჩემპიონთან ევრობასკეტის მერვედფინალში და გამოიყენა კიდეც. მთავარია, შანსი ჟინად გარდაიქმნას: საკუთარი თვალით ვნახეთ კალათბურთელების მოუთოკავი ჟინი, რომელმაც ჯერ ევროპის მოქმედი ჩემპიონი, შემდეგ კი საფრანგეთი 10-ქულიანი სხვაობით (70:80) დაამარცხა და ახლა, ნაკრები უკვე ნახევარფინალში გასვლაზე ფიქრობს.

უდავოა, რომ მუნდიალზე გასვლის შანსი ნამდვილად გვაქვს. მომდევნო მატჩში, ოქტომბერში ორი გასვლითი შეხვედრა გველოდება: ჯერ ესპანეთთან, შემდეგ კი თურქეთთან ვითამაშებთ. გადაჭარბებული არ იქნება, თუკი ვიტყვით, რომ ესპანეთი არაამქვეყნიურ ფეხბურთს თამაშობს (გუშინ თურქეთი ანგარიშით 0:6 დაამარცხა) და შესაძლოა, მასთან ქულის აღება ძალიან გაჭირდეს, თუმცა თურქეთთან გამარჯვება, კიტეიშვილი-ჩაკვეტაძის დაბრუნების შემთხვევაში, აბსოლუტურად რეალისტურია.

ასევე აღსანიშნავია, რომ ჯგუფში მე-5 შეხვედრაში, ესპანეთი საქართველოში გვესტუმრება და ამ მომენტისთვის, დიდი შანსია, ესპანელებს გასვლა გარანტირებული ჰქონდეთ, ჩვენ კი უფრო მეტისთვის საბრძოლველი. ასეთ ვითარებაში გრანდის დამარცხება შეგვიძლია, რაზეც ევრო 2024-იც მოწმობს, როდესაც პორტუგალიის ნაკრები ანგარიშით 2:0 დავამარცხეთ.

მეორე ადგილისთვის ბრძოლაში, საქართველოს ნაკრების მთავარი კონკურენტი თურქეთია, ნაკრები, რომელსაც შესანიშნავი ახალი თაობა (ილდიზი, გიულერი, სხვ.), კარგი მწვრთნელი (ვინჩენცო მონტელა) და გამართული სისტემა აქვს. რამდენად შეძლებს ამ ფორმაში მყოფი ჩვენი მოკავშირე ბულგარეთი მეზობლისთვის ქულების ჩამორთმევას სათუოა, თუმცა, არც თურქეთის 6 ბურთით მარცხი იყო მოსალოდნელი ესპანეთთან. აქვე უნდა ითქვას, რომ ჯგუფურ ეტაპზე თანაბარი ქულების დაგროვების შემთხვევაში, უპირატესობა გატანილ-გაშვებული გოლების უკეთესი ბალანსის მქონე ნაკრებს მიენიჭება.

გვაქვს შანსი და რატომაც არა, ერთად ვიბრძოლებთ გამარჯვებისთვის. ჩვენ უკვე ვიხილეთ საქართველოს ნაკრების ფეხბურთელების თვალებში ანთებული ცეცხლი, ჟინი და თავდაჯერება, რომლებიც დამარცხებას არ ცნობსდა თავისას აუცილებლად გაიტანს.

წინ სადებიუტო მუნდიალი გელოდება.

საქართველოს ეროვნული საფეხბურთო ნაკრების, ასევე, ეროვნული საკალათბურთო ნაკრების მთავარი სპონსორია საქართველოს ბანკი.

არ გაჩერდე, საქართველო!