"ქართულ ოცნებას ზონდერები არ ჰყავს. ქართულ ოცნებას ჰყავს ერთგული ჯარისკაცები", — ასე გამოეხმაურა ოცნების წევრი, არჩილ გორდულაძე 8 სექტემბერს კახა კალაძის საარჩევნო შტაბთან მომხდარ ძალადობას. მისი თქმით, ტყუილია ის, რომ "ადგილი ჰქონდა ძალადობას ქართული ოცნების პარტიის აქტივის და წევრები მხრიდან".

"ტიტუშკები მოიკითხეთ ნაციონალურ მოძრაობაში. "ქართულ ოცნებას" ზონდერები არ ჰყავს. ქართულ ოცნებას ჰყავს ერთგული ჯარისკაცები. რომელთა რაოდენობა 41 000-ზე მეტია და ჩვენს გვყავს ადამიანები, მხარდამჭერები, რომელთა რაოდენობა არის მილიონ 120 000-მეტი. ...მე ვიყავი სულ აქ, მთელი დღეების განმავლობაში.... ზონდერები მოითხოვეთ ნაციონალურ მოძრაობაში.

ჟურნალისტის კითხვაზე — "რატომ ჰქონდა ადგილი ასეთ ძალადობას თქვენი პარტიის აქტივის და წევრები მხრიდან", "ოცნების" წევრი, არჩილ გორდულაძე პასუხობს — "ტყუილია".

კახა კალაძის შტაბთან ხალხმრავალი აქციები რამდენიმე დღეა იმართება. 8 სექტემბერს მელიქიშვილის გამზირზე ოცნების მხარდამჭერები ფიზიკურად დაუპირისპირდნენ იქ შეკრებილ მოქალაქეებს, აქტივისტებსა და ჟურნალისტებს. ე.წ. ტიტუშკებმა იძალადეს "პუბლიკის", "ნეტგაზეთის" და ასევე უნგრელ ჟურნალისტ ლასლო მეზეშზე. ის სასწრაფო დახმარების ეკიპაჟმა კლინიკაში გადაიყვანა. ამ დრომდე არც ერთი მოძალადე დაკავებული არ არის.

შინაგან საქმეთა სამინისტრომ მელიქიშვილის გამზირზე მომხდარ დაპირისპირებასთან დაკავშირებით გამოძიება ჯგუფური ძალადობის მუხლოთ დაიწყო. მოგვიანებით, გეკალ გელაძის უწყებამ გაავრცელა ინფორმაცია, რომ გამოძიება ჯგუფურად ჩადენილ ძალადობისა და წინასაარჩევნო კამპანიის დროს ძალადობის მუხლითაა დაწყებული.