პირთა არანებაყოფლობით ნარკოლოგიურ შემოწმების შესახებ კანონპროექტებს იურიდიულ საკითხთა კომიტეტმა მხარი არ დაუჭირა.

დღეს, 19 მაისს, საქართველოს ადმინისტრაციულ სამართალდარღვევათა კოდექსსა და პოლიციის შესახებ საქართველოს კანონში ცვლილების შეტანის შესახებ, კანონპროექტები პარლამენტმა დღეს განიხილა.

კანონპროექტის ავტორი ახალი პოლიტიკური ცენტრის, გირჩის ერთ-ერთი ლიდერი, გოგა ხაჩიძეა.

იგი სოციალურ ქსელში გაკეთებულ განცხადებაში ამბობს, რომ კომიტეტზე დამსწრეებს არანაირი საწინააღმდეგო, ან სხვა პოზიცია არ გამოუთქვამთ. კენჭისყრის დროს, ხუთმა დეპუტატმა დაუჭირა მხარი, წინააღმდეგი კი არავინ არ იყო, შესაბამისად საკმარისი არ აღმოჩნდა ხმების რაოდენობა.

ხაჩიძის თქმით, დარჩენილია კიდევ ერთი საკომიტეტო მოსმენა. საკითხი გადაინაცვლებს პლენარულ სესიაზე:

"სანამ კანონპროექტი სასესიო განხილვაზე გავა, ვეცდებით, ყველა დეპუტატს ავუხსნათ კანონპროექტის არსი".

კანონპროექტის თანახმად, პირის დაკავებისთვის, პოლიციელს უნდა ჰქონდეს დასაბუთებული ვარაუდი, რომ მან მოიხმარა ნარკოტიკული ნივთიერება ექიმის დანიშნულების გარეშე. დაკავების შემდეგ თუ პირი არ იქნება თანახმა რომ ჩააბაროს ნარკოტესტი, პოლიციელი შეადგენს ადმინისტრაციულ სამართალდარღვევათა შესახებ ოქმს და წარადგენს სასამართლოში.

პროექტის ინიციატორის განმარტებით, კანონპროექტის მიღება აუცილებელია სავიზო ლიბერალიზაციის სამოქმედო გეგმიდან გამომდინარე.