დღეს, 10 მაისს, იურიდიულ საკითხთა კომიტეტი პირთა არანებაყოფლობით ნარკოლოგიური შემოწმების შესახებ კანონპროექტს განიხილავს. როგორც პროექტის განმარტებით ბარათში წერია, მისი მიღების შედეგად, მხოლოდ სასამართლოს კონტროლით, სასამართლოს განჩინების საფუძველზე განხორციელდება პირთა არანებაყოფლობითი ნარკოლოგიური შემოწმება.

კანონპროექტის თანახმად, პირის დაკავებისთვის, პოლიციელს უნდა ჰქონდეს დასაბუთებული ვარაუდი, რომ მან მოიხმარა ნარკოტიკული ნივთიერება ექიმის დანიშნულების გარეშე. დაკავების შემდეგ თუ პირი არ იქნება თანახმა რომ ჩააბაროს ნარკოტესტი, პოლიციელი შეადგენს ადმინისტრაციულ სამართალდარღვევათა შესახებ ოქმს და წარადგენს სასამართლოში.

პროექტის ინიციატორის განმარტებით, კანონპროექტის მიღება აუცილებელია სავიზო ლიბერალიზაციის სამოქმედო გეგმიდან გამომდინარე.

ასევე, კანონპროექტში მითითებულია კვლევის "ნარკოვითარება საქართველოში" შედეგებიც, რომლის მიხედვით, 2013 წელს, ჯამში 60,196 ადამიანის ტესტირება მოხდა ბიოლოგიურ სითხეში ნარკოტიკებსა და მეტაბოლიტებზე, დადებითი 22,711 შემთხვევით.

კანონპროექტი ინიცირებულია ახალი პოლიტიკური ცენტრი გირჩის წევრის გოგა ხაჩიძის მიერ.