ევროკავშირი ოპოზიციონერ ხუან გუაიდოს ვენესუელის დროებით პრეზიდენტად აღარ აღიარებს, რადგან ის პარლამენტის სპიკერის პოსტს აღარ იკავებს. Reuters-ის ინფორმაციით, ევროკავშირმა მკაცრად გააკრიტიკა მადუროს რეჟიმი და მის მთავრობას სამომავლო სანქციებით ემუქრება.

გუაიდოს ვენესუელის ლიდერად კვლავ აღიარებენ აშშ და დიდი ბრიტანეთი. ევროკავშირმა თავის განცხადებაში ხუან გუაიდო "წარმავალი ეროვნული ასამბლეის თავმჯდომარედ" მოიხსენია. გარდა ამისა, მათ გააკრიტიკეს 6 დეკემბერს ჩატარებული საპარლამენტო არჩევნები, რომელიც ბევრი ქვეყნის აზრით, ფალსიფიცირებული იყო.

როგორც ევროკავშირის ორმა დიპლომატმა განმარტა, გუაიდო კვლავ რჩება ყველაზე მნიშვნელოვან პროდემოკრატ ფიგურად ვენესუელაში, თუმცა მის თვითგამოცხადებულ დროებით პრეზიდენტობას აღარ აქვს ინსტიტუციონალური სტატუსი, რადგან პარლამენტზე კონტროლი მადურომ მოიპოვა.

6 იანვარს ვენესუელაში მუშაობა დაიწყო ეროვნული ასამბლეის ახალმა მოწვევამ, სადაც უმრავლესობას პრეზიდენტი ნიკოლას მადუროს სოციალისტური პარტია წარმოადგენს. აქამდე ქვეყნის პარლამენტი იყო ერთადერთი პოლიტიკური ორგანო ქვეყანაში, რომელსაც მადურო ვერ აკონტროლებდა.

ოპოზიცია არჩევნების შედეგებს არ აღიარებს. ხუან გუაიდომ ფიცი წინა მოწვევის პარლამენტარებთან ერთად პარლამენტის შენობის გარეთ დადო. ჯერ კიდევ 26 დეკემბერს მან განაცხადა, რომ ძველი ასამბლეა საკანონმდებლო საქმიანობას გააგრძელებდა.

ვენესუელაში პოლიტიკური კრიზისი 2019 წლის იანვარში გამწვავდა, როცა ოპოზიციის მიერ კონტროლირებადმა პარლამენტმა ხუან გუაიდო დროებით პრეზიდენტად გამოაცხადა. მისი ლეგიტიმურობა 50-მდე ქვეყანამ აღიარა, მათ შორის საქართველომ.

გუაიდო და მისი მხარდამჭერები ამბობენ, რომ 2018 წლის საპრეზიდენტო არჩევნები, რომლის შედეგადაც მადურო ხელისუფლებაში დარჩა, გაყალბდა. მისივე სიტყვებით, რადგან არჩევნები არასამართლიანი და არადემოკრატიული იყო, შესაბამისად პრეზიდენტის პოსტით თავისუფალი დარჩა. მან კონსტიტუცია მოიშველია, რომლის თანახმადაც, პარლამენტის სპიკერი დროებითი პრეზიდენტი ხდება.

მიუხედავად იმისა, რომ გუაიდოს ლეგიტიმურობა ქვეყნების დიდმა ნაწილმა აღიარა, მადურომა შეინარჩუნა გავლენა ძალოვან სტრუქტურებზე, საარჩევნო ორგანოებსა და სასამართლოების დიდ ნაწილზე. ამასთან, მას მხარს უჭერენ რუსეთი და ჩინეთი.

ოპოზიციის უმრავლესობამ გადაწყვიტა ბოიკოტი გამოეცხადებინა მადუროს არჩევნებისთვის, რადგან მიაჩნდათ, რომ ის თავისუფალი და სამართლიანი ვერ იქნებოდა. გარდა ამისა, ასამბლეამ ოპოზიციის ხელმძღვანელობით საკანონმდებლო ვადა გაიხანგრძლივა, სანამ ქვეყანაში დემოკრატია არ იქნება აღდგენილი. მათ ფიცის დადების ცერემონია ეროვნული ასამბლეის კედლებს გარეთ ჩაატარეს, სადაც სპიკერად კვლავ ხუან გუაიდო აირჩიეს.