პატრიოტთა ალიანსის ერთ-ერთი ლიდერის, ირმა ინაშვილის განცხადებით, პარტიული სიის მე-7 ნომერი, ფრიდონ ინჯია თუ პარლამენტში შევა, ის პარტიას დატოვებს.

"ბიზნესმენები არ არიან ჩვენი პარტიის წევრები, შესაბამისად მე არ მაქვს არანაირი ბერკეტი მათზე ზემოქმედების. პოლიტიკოსები არ შევდივართ პარლამენტში. პარტია, პატრიოტთა ალიანსი არ იქნება პარლამენტში წარმოდგენილი. არის ბატონი, ფრიდონ ინჯია, რომელიც პარტიის წევრია, მაგრამ ჩვენ ვიმსჯელეთ და ბატონი ფრიდონი დადგება არჩევანის წინაშე — დარჩეს პარტიაში თუ შევიდეს პარლამენტში. თუ შევა ბატონი ფრიდონი პარლამენტში, პარტიას დატოვებს", — განაცხადა ინაშვილმა.

დღეს, 3 იანვარს პატრიოტთა ალიანსის სიის მე-8 ნომერმა, დავით ზილფიმიანმა განაცხადა, რომ პარლამენტში ადამიანი თავისი მრწამსიდან გამომდინარე უნდა შედიოდნენ და ამაზე მას გადაწყვეტილება ჯერჯერობით არ მიუღია. ზილფიმიანი ინჯიასგან განსხვავებით, პარტიის წევრი არ არის.