საქართველოს ჯანდაცვის მინისტრი, ეკატერინე ტიკარაძე არ აკონკრეტებს, ვის გულისხმობდა განცხადებაში, როცა თქვა, რომ მმართველ გუნდში არიან ადამიანები, რომლებიც დაინტერესებული არიან, "საქართველოს ჰყავდეს ცუდი ჯანდაცვის მინისტრი". ამ თემაზე კითხვას მან არ უპასუხა და ჟურნალისტებს უთხრა, რომ სკანდალს ეძებენ და ჩანაწერს თავიდან მოუსმინონ.

"ის, თუ ვინ არის დაინტერესებული, რომ საქართველოს ჰყავდეს ცუდი ჯანდაცვის მინისტრი ეს იყო კითხვაზე პასუხი, სადაც საუბარი იყო იმასთან დაკავშირებით, რომ მინისტრი არ ფლობს დიპლომს. ვინ არის ამაში დაინტერესებული და მე ვხედავ, რომ გარკვეული ჯგუფები არიან ამით დაინტერესებული. რაც შეეხება, ბრძოლასთან დაკავშირებულ კითხვებს, აქ განმარტებული იყო, რომ გარკვეულ ბიზნესწარმომადგენლებს შეიძლება ჰქონდეთ მსგავსი ინტერესი, თუმცა დასახელებულები ჯგუფის წევრები ნამდვილად არ ყოფილან და არც გუნდში მყოფი არც ერთი მაღალჩინოსანი. [...] მე მესმის, რომ თქვენ ეძებთ სკანდალს, მაშინ ადექით და გადაახვიეთ და მოუსმინეთ ამ ჩანაწერს თავიდან", — განაცხადა ტიკარაძემ.

ის არ გამორიცხავს გუნდის გარეთ იყვნენ ისეთი ადამიანები, ვისაც არ სურს "მისი წარმატება".

ჯანდაცვის მინისტრმა 16 დეკემბერს განაცხადა, რომ მათ გუნდში არის ხალხი, რომელიც დაინტერესებულია, რომ საქართველოს ჰყავდეს "ცუდი" ჯანდაცვის მინისტრი. ასე უპასუხა ტიკარაძემ მის მიმართ დაწყებული ნეგატიური კამპანიის შესახებ დასმულ შეკითხვას: "როგორ ფიქრობთ, გუნდში ვერ აიტანა ვინმემ თქვენი პირადი წარმატება?".