საქართველოს სახალხო დამცველის, ნინო ლომჯარიას განმარტებით, ხმების პარალელური დათვლის მეთოდოლოგია მოიცავს საარჩევნო უბნის გახსნიდან მის დახურვამდე მიმდინარე პროცედურებზე დაკვირვებას. TV პირველის ეთერში ლომჯარიამ განაცხადა, რომ PTV მეთოდოლოგიით შესაძლებელია არა მხოლოდ საარჩენო პროცედურების კონკრეტული დარღვევების გამოვლენა, არამედ შეფასება, რა გავლენის მოხდენა შეეძლოთ მათ არჩევნების საბოლოო შედეგებზე.

"ამ მეთოდოლოგიის საფუძველზე ხდება დაკვირვება უბნების გახსნიდან უბნის დახურვამდე ყველა პროცედურაზე და თითოეულ ეტაპზე გამოვლენილ დარღვევასთან დაკავშირებით იგზავნება მონაცემები სპეციალურ სისტემაში, რომელიც აჯამებს ამ მონაცემებს. ხმების პარალელური დათვლა იძლევა საშუალებას, არა მარტო ვიცოდეთ რა კონკრეტულ დარღვევებს ჰქონდა ადგილი სხვადასხვა უბანზე, არამედ, ვიცოდეთ, რა მასშტაბის იყო ეს დარღვევები და რამხელა გავლენა შეიძლება ჰქონოდა ამ დარღვევებს თავად პროცესზე და უკვე, არჩევნების შედეგებზე", — აცხადებს ნინო ლომჯარია.

ნინო ლომჯარიას თქმით, მეთოდოლოგიის ერთ-ერთი მიზანია იმის დადგენა, არჩევნების საბოლოო შედეგები და თითოეულ უბანზე დაფიქსირებული შედეგების ჯამი ცდომილებაში ხომ არ მოდის ერთმანეთთან.

"ეს მეთოდოლოგია გამოიყენება იმ მიზნითაც, რომ ჩვენ დავინახოთ უბნებზე დაფიქსირებული ოქმები ხომ არ შეიცვალა უმაღლესი საარჩევნო ადმინისტრაციის მიერ", — ამბობს ლომჯარია.

სახალხო დამცველი ამბობს, რომ PTV არ არის ზუსტი მეთოდოლოგია და მას აქვს ცდომილების საზღვრები. თუ ცესკოს მიერ გამოქვეყნებული ოფიციალური შედეგები ჯდება PTV-ს ცდომილების ფარგლებში, ეს ნიშნავს, რომ საარჩევნო უბნიდან მონაცემების ცესკოს საიტზე გამოქვეყნებამდე, გზაში, ისინი არსებითად არ შეცვლილა.

"თუ ცესკოს მონაცემები ჯდება მის ცდომილების საზღვრებში, ეს ნიშნავს იმას, რომ უბანზე ოფიციალურად შედგენილი ოქმები, ფაქტობრივად იგივე რაოდენობით აიტვირთა, ან იგივე მონაცემები აიტვირთა ცესკოს მიერ", — ამბობს ლომჯარია.

ნინო ლომჯარია ამბობს, რომ PTV მონაცემების ანალიზისას, სურათი უნდა დავინახოთ ფართო მასშტაბით, რადგან ციფრების სახით დაფიქსირებული შედეგი, მისი მხოლოდ ერთ-ერთი კომპონენტია.

"ის შედეგები, რასაც ხმების პარალელური დათვლა აცხადებს კონკრეტულ სუბიექტებთან მიმართებით შემაჯამებელი ოქმების საფუძველზე, შეიძლება დადგეს კითხვის ნიშნის ქვეშ, ხმების პარალელური დათვლის სხვა მონაცემების საფუძველზე, რომელიც შეეხება თვითონ პროცესის შეფასებას", — განმარტავს ლომჯარია.

ხმების პარალელური დათვლის შედეგების შინაარსზე ისაუბრა ქართული ოცნების აღმასრულებელმა მდივანმა, ირაკლი კობახიძემაც. დღეს, პარტიის ოფისში, სამართლიანი არჩევნების მიერ ჩატარებული PTV-ს გამოსათვლელი ფორმულის ხარვეზთან დაკავშირებით გამართულ ბრიფინგზე, კობახიძემ განაცხადა, რომ იგი არა მხოლოდ ოქმების, არამედ მთლიანად, საუბნო ხმების დათვლაა.

სამართლიანი არჩევნების ხელმძღვანელის, ელენე ნიჟარაძის განცხადებით, ორგანიზაციას არანაირი ოქმები არ შეუდგენია და ცალკე არჩევნები არ ჩაუტარებია. ნიჟარაძე ამბობს, რომ მათ დათვალეს ცენრტალური საარჩევნო კომისიის მიერ შედგენილი ოქმები.

გირჩის ლიდერი, ზურაბ ჯაფარიძე ამბობს, რომ ოქმების პარალელური დათვლა ვერ ადგენს შესაძლო დარღვევების მნიშვნელოვან ნაწილს. მისი თქმით, სამართლიანი არჩევნების მიერ შესაძლო მათემატიკური შეცდომის დაშვება არ ნიშნავს, რომ საერთო ჯამში არჩევნები კარგად ჩატარდა.

ISFED-ის პარალელური დათვლის ხარვეზი

ISFED-ის ცნობით, ხმების პარალელური დათვლის პირველადი შიდა აუდიტის შედეგებმა საარჩევნო სუბიექტების მიერ მიღებული ხმების გამოსათვლელ ფორმულაში ხარვეზი გამოავლინა. ამასთან, როგორც ორგანიზაციაში ამბობენ, აუდიტმა PVT-ს მეთოდოლოგიის სიზუსტე და დამკვირვებლების მიერ მოწოდებული ინფორმაციის სანდოობა დაადასტურა.

მანამდე ცნობილი გახდა, რომ მმართველი პარტიის წარმომადგენლები ISFED-ს შეხვდნენ. ქართულ ოცნებაში აცხადებდნენ, რომ შეხვედრა ISFED-ის მიერ ჩატარებული პარალელური ხმის დათვლის შედეგებს ეხებოდა და მათ ორგანიზაციას მეთოდოლოგიის შესახებ მონაცემების წარმოდგენა მოსთხოვეს.

ქართული ოცნების აღმასრულებელი მდივნის, ირაკლი კობახიძის განცხადებით, ISFED-ის პარალელური დათვლა აჩვენებდა, რომ ცესკომ მეტი შედეგი დაუწერა არა მხოლოდ ქართულ ოცნებას, არამედ პროპორციულად სხვა პოლიტიკურ პარტიებსაც. როგორც მან ბრიფინგზე თქვა, სწორედ ამის გამო ნათელი იყო, რომ PVT-ში (პარალელურ დათვლაში) შეცდომა იყო დაშვებული.

თავდაპირველად, 31 ოქტომბრის არჩევნების პარალელური დათვლის (PVT) შედეგების მიხედვით, ქართულმა ოცნებამ 45,8% აიღო, ხოლო ნაციონალურმა მოძრაობამ 26,4%. 11 დეკემბერს ISFED-ის მიერ გასწორებული მონაცემების მიხედვით კი, ქართულმა ოცნებამ 47,6%, ხოლო ნაციონალურმა მოძრაობამ 27,4% აიღო, რაც ცდომილების ზღვარის გათვალისწინებით ცესკოს მონაცემებთან უფრო ახლოსაა. ცესკოს დათვლით, ქართულმა ოცნებამ ხმების 48,22%, ნაციონალურმა მოძრაობამ კი — 27,17% მიიღო.

ISFED-ის ხელმძღვანელის, ელენე ნიჟარაძის განმარტებით, ISFED-ის პარალელურ დათვლაში გამოვლინდა ხარვეზი იმ კუთხით, რომ საარჩევნო სუბიექტების ხმებთან ერთად დათვლილი იყო ბათილი ბიულეტენები, რამაც ცესკოს მონაცემებთან შედარებით სამი პარტიის შემთხვევაში ცდომილება გამოიწვია. ესენია: ქართული ოცნება, ნაციონალური მოძრაობა და სტრატეგია აღმაშენებელი.

როგორც იგი ამბობს, ეს არის მცირე ხარვეზი, რომელსაც მანდატების გადანაწილებაზე გავლენა არ აქვს. თუმცა, ამავე დროს, აღიარებს, რომ რეპუტაციულად ორგანიზაციისთვის მძიმე დარტყმაა.

გაიგეთ მეტი: