საფრანგეთის ქალაქმა ნანტმა, რომელიც 1979 წლიდანაა დაძმობილებული საქართველოს დედაქალაქ თბილისთან, გადაწყვიტა, თბილისთან დაძმობილება შეწყვიტოს, — ამის შესახებ ინფორმაციას ადგილობრივი მედია ავრცელებს.

ნანტმა გადაწყვიტა, თბილისთან დაძმობილება შეწყვიტოს, მაგრამ ირწმუნება, რომ გააგრძელებს "ქართველი დაინტერესებული მხარეების მხარდაჭერას ნანტის ასოციაციებისა და სამოქალაქო საზოგადოების მეშვეობით".

პრესრელიზში ნანტის მერიამ განმარტა, რომ 2024 წლის დეკემბრიდან შეშფოთებული არიან "საქართველოს პოლიტიკური ვითარებით და ქვეყანაში მრავალრიცხოვანი დემონსტრაციების შემდეგ ოპონენტების რეპრესიებით".

გარდა ამისა, ნანტის მერიამ შეიტყო, „რომ თბილისის მერიის საერთაშორისო ურთიერთობების დეპარტამენტის რამდენიმე თანამშრომელი, რომელთანაც ის მრავალი წლის განმავლობაში თანამშრომლობდა, თანამდებობიდან გაათავისუფლეს“.

მათ დაგმეს პოლიტიკური ნიშნით, ღიად პროევროპული პოზიციების გამო სამსახურიდან გათავისუფლებები საერთაშორისო ურთიერთობების დეპარტამენტში.

ადგილობრივი მედიის ცნობით, ორ ქალაქს შორის დაძმობილების შეჩერება გაგრძელდება მანამდე, „სანამ თანამშრომლობის პირობები არ დაკმაყოფილდება“.