ქართული ოცნების დეპუტატის, ელისო ბოლქვაძის განცხადებით, ახალგაზრდობა დაინტერესებული უნდა იყოს წინსვლითა და მეცადინეობით. აღნიშნული განცხადება ბოლქვაძემ 20 ივნისთან დაკავშირებით გააკეთა.

მე-10 მოწვევის პარლამენტის პირველ სხდომაზე 11 დეკემბერს ელისო ბოლქვაძესა და მთავარი არხის ჟურნალისტს შორის შემდეგი დიალოგი გაიმართა:

ბოლქვაძე: საკანონმდებლო ორგანოს წინ ასეთი რამ არ....

ჟურნალისტი: საფრანგეთში ჯიკაობა არ გინახავთ?

ბოლქვაძე: რა თქმა უნდა, მინახავს ოღონდ ქუჩაში, ქუჩაში გამოსვლების მეტი რა მინახავს.

ჟურნალისტი: და დათხრილი თვალები გინახავთ?

ბოლქვაძე: ახალგაზრდობა დაინტერესებული უნდა იყოს თავისი წინსვლით და უნდა იჯდეს იმეცადინოს, წარმატებებს მიაღწიოს.

ჟურნალისტი: და არ უნდა გააპროტესტონ რაც არ მოსწონთ?

ბოლქვაძე: მე დღეს გავრილოვის თემას არ ვეხები და არ ვიხილავ ამ თემას.

20 ივნისს საქართველოს პარლამენტში რუსი დეპუტატის, სერგეი გავრილოვის მიერ თავმჯდომარის სკამის დაკავებას საპროტესტო ტალღა მოჰყვა. მოქალაქეები და ოპოზიციის წევრები ითხოვდნენ პარლამენტის თავმჯდომარის, სუს-ის ხელმძღვანელის და შს მინისტრის გადადგომას.

მშვიდობიანი პროტესტი მოგვიანებით დაპირისპირებაში გადაიზარდა და ცენტრალურ გამზირზე მობილიზებულმა სპეცრაზმმა აქციის დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. საგამოძიებო უწყებამ დაზარალებულად 67 სამართალდამცავი და 4 მოქალაქე ცნო. ამავე საქმეზე ბრალი წაუყენეს 3 სამართალდამცავსა და 17 მოქალაქეს.