ევროკავშირის ელჩი საქართველოში, კარლ ჰარცელი აცხადებს, რომ პოლიტიკური პარტიების მოლაპარაკებების ყველაზე იმედისმომცემი ნაწილი იყო ის, რომ საარჩევნო რეფორმებთან დაკავშირებით საერთო მონახეს. ამის შესახებ ელჩმა ჟურნალისტებს განუცხადა.

როგორც იგი აღნიშნავს, რთული დისკუსიის მიუხედავად, ბოლო ორი დღის განმავლობაში მნიშვნელოვან პროგრესს მიაღწიეს.

"ჩემი აზრით, დისკუსიის ყველაზე იმედისმომცემი ნაწილი იყო ის, რომ მოვახერხეთ საერთო მოგვენახა მომავალ საარჩევნო რეფორმებთან დაკავშირებით. ეს ჩემთვის ძალიან, ძალიან მნიშვნელოვანია, რადგან ესაა გასაღები, რათა მომავალი არჩევნები ჩატარდეს ნაკლები ხარვეზებით და ნაკლები პრობლემებით, ვიდრე ეს ამ არჩევნებზე ვნახეთ და გვინახავს წინა არჩევნებზე. ჩემი აზრით ეს კარგი ახალი ამბავია", — აღნიშნა ჰარცელმა.

ელჩის თქმით, სხვა საკითხზე მოლაპარაკებები კვლავ გრძელდება. მან, ასევე, დაადასტურა, რომ კიდევ ერთი შეხვედრა ხვალ, 10 დეკემბერს გაიმართება.

ახლადარჩეული პარლამენტის პირველ სხდომამდე ორი დღით ადრე, პარტია მოქალაქეების ლიდერმა, ალეკო ელისაშვილმა განაცხადა, რომ პარლამენტში იმ შემთხვევაში შევა, თუ ელჩებთან მოლაპარაკებების პროცესში საარჩევნო კანონმდებლობისა და საარჩევნო ადმინისტრაციების რეფორმებზე შეთანხმდებიან. მისი თქმით, მხოლოდ ეს რომ მოიპოვოს და პოლიტიკაში სხვა არაფერი გამოუვიდეს, მთელი ცხოვრება კმაყოფილი იქნება. Facebook ლაივში მან ასევე აღნიშნა, რომ ფულზე არასდროს გაიყიდება.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და არჩევნების მეორე ტურსაც ბოიკოტი გამოუცხადეს, რომელიც 21 ნოემბერს ჩატარდა.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

მეოთხე რაუნდი 8 დეკემბერს შედგა. ოპოზიციისა და მმართველი პარტიის წინადადებები მხარეებმა პუნქტებად განიხილეს. როგორც შეხვედრის დასრულების შემდეგ განაცხადეს, იყო საკითხები, რომლებზეც თანხვედრა მოხდა, თუმცა, დარჩა რამდენიმე პრინციპული თემა, რაზეც ჯერ ვერ შეთანხმდნენ. ამის ფონზე, ქართული ოცნების ლიდერები აცხადებენ, რომ მათი განწყობა პოზიტიურია და სჯერათ — მომავალ წელს პარლამენტში ყველა დეპუტატი იქნება.