ოცნების პარლამენტის თავმჯდომარე, შალვა პაპუაშვილი საქართველოში ბრიტანეთის საელჩოს განცხადებას ეხმაურება, სადაც საელჩო "ოცნების" ხელისუფლებას მოუწოდებს, რომ "მოიწვიოს ეუთო/ოდირის მისია ოქტომბრის მუნიციპალური არჩევნების დასაკვირვებლად. ამავე განცხადებაში წერია, რომ საელჩო "კატეგორიულად არ ეთანხმებიან სადამკვირვებლო ორგანიზაციების მიერ მონიტორინგის დაფინანსების აღწერას, როგორც "პროპაგანდისა და ექსტრემიზმის" დაფინანსებას".

პაპუაშვილის თქმით, ბრიტანეთის საელჩოში "ფიქრობენ, რომ რაღაცას გაისვრიან და სინამდვილეში, ფეხში ისვრიან და იზიანებენ საკუთარ თავს".

"ცოტა უცნაურია ბრიტანეთის საელჩოს ბოლო განცხადებების რაღაც სერია, რომელსაც ვისმენთ — ისეთი შთაბეჭდილებაა ამ განცხადებების ტონალობიდან გამომდინარე, ფიქრობენ, რომ რაღაცას გაისვრიან და სინამდვილეში, ფეხში ისვრიან ხოლმე ამ განცხადებებით და იზიანებენ საკუთარ თავს.

როგორც წინა ჯერზე იყო საკუთარი თავის დაზიანება და ფეხში ნასროლი იმ მხრივ, რომ თითქოს ჰქონდათ საკრიტიკო, რომ რაღაც თანხმობის პრობლემა არ იყო დასრულებული და ამით გაამჟღავნეს, რომ პროპაგანდას და ექსტრემიზმის დაფინანსებას აპირებდნენ და დაიზიანეს საკუთარი თავი.

ახლა ამ განცხადებას ორი ნაწილი აქვს - პირველი, რაც შეეხება ადგილობრივი თვითმმართველობის არჩევნებს და დამკვირვებლებს (მართლაც ფარისევლობაა, როცა ბრიტანეთი, რომელიც არ აღიარებს ეუთო / ოდირის დასკვნას 2024 წელთან დაკავშირებით, ახლა მოითხოვს და ითხოვს, თუ წინადადებით გამოდის ეუთო / ოდირთან დაკავშირებით).

რაც შეეხება განცხადებას იმასთან დაკავშირებით, რომ თითქოს ბრიტანეთის საელჩომ რაღაც გაისროლა, ახსენა სტრატეგიული პარტნიორობის შეთანხმება და მუხლებზე მითითება, თითქოს რაღაც ირღვევა საქართველოს მხრიდან, აქაც ფეხში ისროლა - თუ უნდათ სამართლებრივ ასპექტებზე საუბარი, არ მგონია, რომ ეს ის სფეროა, რაც არის მომგებიანი.

როცა ბრიტანეთის საელჩო აფინანსებს პროპაგანდისტებს და აფინანსებს ექსტრემისტული დღისწესრიგის მქონე ორგანიზაციებს თუ პირებს, ამით, რა თქმა უნდა ძირს უთხრის დემოკრატიულ ინსტიტუტებს და არღვევს ამ შეთანხმების მეორე მუხლს," — თქვა პაპუაშვილმა.

შეგახსენებთ, რომ 11 ივნისს საქართველოში ბრიტანეთის საელჩომ განცხადება გაავრცელა, სადაც წერია, რომ "უწევთ გააუქმონ დაგეგმილი საგრანტო წინადადებები, რომლებიც მიზნად ისახავდა დაგეგმილი მუნიციპალური არჩევნების გამჭვირვალობისა და კონკურენტუნარიანობის მხარდაჭერას".

საელჩოს თქმით, გაერთიანებული სამეფო კეთილსინდისიერად ცდილობდა მოეპოვებინა გრანტის დამტკიცების შესახებ თანხმობა რიგ პროექტებზე, მაგრამ აცნობეს, რომ "მთავრობის დადგენილება "გრანტების დამტკიცების პროცედურის შესახებ" ჯერ არ არის დასრულებული" და "ამ დრომდე არ არსებობს გრანტების დამტკიცების პროცედურის შესახებ გადაწყვეტილებების მიღების მექანიზმები ან ვადები".

13 ივნისს ოცნების პარლამენტის თავმჯდომარე, შალვა პაპუაშვილი ბრიტანეთის საელჩოს განცხადებას სოციალურ ქსელში გამოეხმაურა. მისი თქმით, საელჩო აპირებდა პროპაგანდისა და ექსტრემიზმის დაფინანსებას.

მეტი ბრიტანეთის საელჩოს განცხადებების შესახებ: