ჯეიმს განმა, მას შემდეგ რაც DC კინოსტუდიის აღმასრულებელი დირექტორი გახდა, განაცხადა, რომ მისი მეთვალყურეობის ქვეშ არც ერთი დაუსრულებელი სცენარი წარმოებაში არ ჩაეშვებოდა. Rolling Stones-თან ინტერვიუში, განმა კინო ინდუსტრიის ე.წ სიკვდილის მიზეზად, ჰოლივუდის ფატალური შეცდომა — სცენარის დაწერის დასრულებამდე ფილმების გადაღების დაწყება დაასახელა.

"ვფიქრობ, მიზეზი, რატომაც კინო ინდუსტრია კვდება სულაც არ არის ის, რომ ხალხს ფილმების ნახვა აღარ სურს", — თქვა განმა — "არც ის, რომ სტრიმინგ სერვისი ძალიან განვითარდა. ამის მთავარი მიზეზი დაუმთავრებელი სცენარებით ფილმების გადაღებაა"

განმა აღნიშნა, რომ DC სტუდიამ არასრულყოფილი სცენარის გამო ახლახან ერთი პროექტი გააუქმა. "ყველას უნდოდა ამ ფილმის გადაღება, მწვანე შუქიც ანთებული ჰქონდათ, მაგრამ სცენარი მზად არ იყო. მე ვერ ვიქნები პასუხისმგებელი ისეთ ფილმზე, რომელიც ცუდად არის დაწერილი. ჯერ-ჯერობით კი ძალიან გვიმართლებს, რადგან სუპერგოგოს სცენარი დასაწყისიდანვე განსაკუთრებულად მაგარია, ფარნების (Lanterns) სცენარიც ასევე კარგია და იგივე შემიძლია ვთქვა Clayface-ზე. მოკლედ, ჩვენ გვაქვს გამორჩეული მასალა, რასაც იღბალს უნდა ვუმადლოდეთ ან ჭკვიანურად მიღებულ გადაწყვეტილებებს".

მან ასევე ისაუბრა Warner Brothers-ის სამუშაო პოლიტიკაზე და ახსენა, რომ არ აკისრია კონკრეტული რაოდენობის ფილმების გამოშვების ვალდებულება. როგორც განი ამბობს, დისნეიმ ეს შეცდომა დაუშვა, როცა დისნეი პლუსის გამოსვლისას მარველს გაუზარდეს შესასრულებელი პროექტების რიცხვი, რამაც MCU-ზე ნეგატიურად იმოქმედა. დისნეის ეს შეცდომა ღიად აღიარა მისმა აღმასრულებელმა დირექტორმა, ბობ იგერმაც.

"ჩვენ არ გვაქვს განსაზღვრული ვალდებულება, რომ წელიწადში ამა და ამ რაოდენობის ფილმი ან სერიალი გამოვუშვათ (იგულისხმება DCU). ასე რომ, ჩვენ მხოლოდ იმას მივაწვდით მაყურებელს, რაც საუკეთესოდ მიგვაჩნია. რა თქმა უნდა ყველაფერი უბადლო ვერ იქნება, თუმცა ვიმედოვნებთ, რომ ფილმების დონის საშუალო ზღვარი მაქსიმალურად მაღალი იქნება. სცენარი სანამ პირადად არ მომეწონება, იქამდე მუშაობა არაფერზე დაიწყება".

სუპერმენით, რომელსაც შემდეგ თვეს ვიხილავთ ეკრანებზე, ჯეიმს განის DCU პირველ ნაბიჯებს გადადგამს. ასევე, დასრულებულია სუპერგოგოს (2026) გადაღებებიც. სამომავლოდ კი მათი გეგმის მიხედვით, დიდ ეკრანზე უნდა ველოდოთ ახალ ბეტმენსა და ვანდერ ვუმენს.

"ბეტმენის საკითხი პირადად ჩემთვის, ყველაზე დიდი დაბრკოლებაა ამწამს" — განუცხადა განმა Rolling Stones-ს. "სცენარისტთან ერთად ვმუშაობ და ვცდილობ ყველაფერი იდეალურად იყოს, რადგან ბეტმენი წარმოუდგენლად მნიშნველოვანი პერსონაჟია DC-ისთვის, ისევე, როგორც ვანდერ ვუმენი. ასე რომ გარდა იმ პროექტებისა, რომლებიც აქტიურად მიმდინარეობს, ჩვენი მთავარი მიზანია ბეტმენისა (მამაცი და გაბედული) და ვანდერ ვუმენის სცენარების დასრულება".

"ბეტმენს სჭირდება სწორი წარდგენა, ხომ მეთანხმებით? არ შეიძლება მასზე ფილმის გადაღება მხოლოდ იმიტომ, რომ Warner Brothers-ის ყველაზე პოპულარული პერსონაჟია. DCU-ს სჭირდება თავისი ბეტმენი, ცხადია ის არის ისეთი, როგორიც მატ რივზისაა. მაგრამ ასევე არც კარიკატურულია. მე არ მაინტერესებს სასაცილო, კიტჩური ბეტმენი. ახლა ამასთან ჭიდილში ვართ, თუმცა ვფიქრობ უკვე ვიპოვე გზა, უბრალოდ სცენარისტთან უნდა შევათანხმო და შევძლოთ ეს იდეა რეალობად ვაქციოთ".

განმა ასევე აღნიშნა, რომ მისთვის ვანდერ ვუმენზე ფილმის გადაღება სინამდვილეში უფრო მარტივია, რადგან ვანდერ ვუმენს უსასრულო რაოდენობის ადაპტაცია არ აქვს — ყოველ შემთხვევაში, ფილმებში მაინც, რასაც ვერ ვიტყოდით ბეტმენზე.

"უკანასკნელი 30 წლის განმავლობაში გამოსული DC-ის კომიქსების თითქმის ნახევარში შეხვდებით ბეტმენს. ის მთელ მსოფლიოში ყველაზე ცნობილი და პოპულარული სუპერგმირია. ხალხს უყვარს მისი საინტერესო პერსონაჟი, თუმცა ასევე აქვს ბევრი ისეთი რამ, რაც მოსაწყენს ხდის. როგორ უნდა შექმნა ბეტმენზე ფილმი, რომელიც საყურებლად გასართობი იქნება"?

სუპერგმირების სამყაროში ერთხმად აღიარებული ჯეიმს განი DC-ის სამყაროში ახალი იმპერიის მშენებლობას იწყებს. სუპერმენი კი რიგით პირველი ფილმი იქნება, რომელიც შეეცდება სტუდიას დაკარგული პოპულარობა დაუბრუნოს და DCEU-საგან მოვლენილი ბნელი საუკუნეები რენესანსით შეცვალოს.

ქართველ მაყურებელს სუპერმენის ხილვა კინოთეატრებში 10 ივლისიდან შეეძლებათ.