"თუ დავდგებით იმ ფაქტის წინაშე, რომ რომელიმე სუბიექტი გადაწყვეტს, რომ კანონი [FARA] არ აღასრულოს, რა თქმა უნდა ვიმოქმედებთ კანონის შესაბამისად, — ამის შესახებ ანტიკორუფციული ბიუროს ხელმძღვანელმა,რაჟდენ კუპრაშვილმა FARA-ს აღსრულების მექანიზმებზე საუბრისას განაცხადა.

რაც შეეხება სისხლის სამართლის პასუხისმგებლობას, მისი თქმით, "მათი მანდატი არ არის გამოიძიონ საქმეები სისხლის სამართლის მიმართულებით. ჩვენი მანდატი არის დავადგინოთ კონკრეტული სუბიექტები ექვემდებარებიან თუ არა ფარაში რეგისტრაციას", — თქვა კუპრაშვილმა.

მანამდე ბრიფინგზე ანტიკორუფციული ბიუროს ხელმძღვანელმა Fara-ს კანონთან მიმართებაში ანტოკორუფიული ბიუროს როლზე ისაუბრა და თქვა, რომ "ანტიკორუფციული ბიურო კანონმდებლობით მინიჭებული მანდატის ფარგლებში ახორციელებს მოქალაქეთა პოლიტიკური გაერთიანების, საარჩევნო სუბიექტებისა და გაცხადებული საარჩევნო მიზნის მქონე პირების ფინანსური საქმიანობის მონიტორინგს".

"საქართველოს კანონის Fara-ს აღსრულების მიზნით სათანადო ღონისძიებებს ასევე ვახორციელებთ გრანტების თანხმობის გარეშე გაცემისა და მიღების, ასევე მიზნობრივად გამოყენების მონიტორინგს. კანონის უზენაესობის და აღსრულების პროცესში ბიურო უფლებამოსილია გამოითხოვოს საჭირო ფინანსური და სამართლებრივი დოკუმენტაცია", — განაცხადა კუპრაშვილმა.

მისი თქმით, დღეს არასამთავრობო ორგანიზაციების მიერ "არასწორი ინფორმაცია, თითქოს ბიურო სასამართლოს ბრძანების საფუძველზე მათი ორგანიზაციებისგან არამიზნობრივად ითხოვს მოქალაქეთა პირადი და პროფესიული საიდუმლოების ამსახველ დოკუმენტაციას".

"დღის განმავლობაში რამდენიმე ორგანიზაციის წარმომადგენელთა მიერ მიზანმიმართულად ვრცელდება არასწორი ინფორმაცია, თითქოს ბიურო სასამართლოს ბრძანების საფუძველზე მათი ორგანიზაციებისგან არამიზნობრივად ითხოვს მოქალაქეთა პირადი და პროფესიული საიდუმლოების ამსახველ დოკუმენტაციას. აღნიშნულთან დაკავშირებით მინდა საზოგადოებას მივაწოდო სრულყოფილი ინფორმაცია — უპირველეს ყოვლისა ვაცხადებ, რომ კანონის უზენაესობა და მისი აღსრულება არის ბიუროს უმთავრესი პრიორიტეტი. ჩვენს მიერ მოთხოვნილი სამართლებრივი და ფინანსური დოკუმენტაცია არ სცდება საკანონმდებლო უფლებამოსილების ფარგლებს, მიმართული არის მხოლოდ გრანტების მიმღები ან პოლიტიკური აქტივობის მქონე ორგანიზაციების საქმიანობის მიზნობრიობის შესწავლისკენ. ამ პროცესში საქართველოს კანონმდებლობის შესაბამისად სრულად იქნება უზრუნველყოფილი პროფესიული თუ პერსონალური ინფორმაციის დაცულობა", — განაცხადა კუპრაშვილმა.

მისი თქმით, "არსებული დეზინფორმაციული კამპანია ემსახურება მოსახლეობის შეცდომაში შეყვანას და მიზნად ისახავს გამჭვირვალობისკენ მიმართული კანონმდებლობისა და სამართლებრივი პროცესის დისკრედიტაციას".

კუპრაშვილის განცხადებას "საფარის" ხელმძღვანელი ბაია პატარაია გამოეხმაურა და ანტიკორუფციული ბიუროს მიერ გამოგზავნილი დოკუმენტი გამოაქვეყნა. მისი თქმით, რაჟდენ კუპრაშვილი ცრუობს. მოცემულ დოკუმენტში წერია, რომ ბიურო არასამთავრობო ორგანიზაციას ბენეფიციარებზე დეტალურ ინფორმაციას სთხოვს, მათ შორის ფოტო/ვიდეო მასალას.

"რაჟდენა ცრუობს, როცა ამბობს, რომ ბენეფიციარებზე ინფორმაცია არ მოუთხოვია საფარისთვის. იხილეთ სასამართლო ბრძანების ნაწილი და თქვენი თვალით ნახეთ, თუ არ წერია ბენეფიციარებზე ინფორმაციის მიწოდების მოთხოვნა.

არ ინერვიულოთ ჩვენო ძვირფასო ბენეფიციარებო, ჩვენ კონფიდენციალურობას სულ დავიცავთ და არავის ხელში არ ჩავუგდებთ თქვენს პირად ინფორმაციას. უფრო მეტიც, ინფორმაციის უდიდესი ნაწილი უკვე განადგურებულია და ძალითაც ვერავინ მოიპოვებს! დაგიცავთ ბოლომდე!", — წერს ბაია პატარაია.

პატარაიამ დღეს დილით არასამთავრობო ორგანიზაციების მიერ გამართულ ბრიფინგზე განაცხადა, რომ "საფარმა" უკვე გაანადგურა მათი დაცვის ქვეშ მყოფების პერსონალური ინფორმაციას, რათა "თავიდან აერიდებინათ" მსგავსი მოთხოვნის შესრულება.

შეგახსენებთ, რომ ბრიფინგი არასამთავრობო ორგანიზაციებმა განაცხადეს, რომ 17 ივნისს ანტიკორუფციულმა ბიურომ რუსული კანონების აღსრულება დაიწყო და სამართლებრივი საფუძვლის გარეშე მათი დაცვის ქვეშ მყოფი მოქალაქეების პერსონალური ინფორმაციის გადაცემა მოსთხოვეს.