დაავადებათა კონტროლის ცენტრის დირექტორი, ამირან გამყრელიძე მოუწოდებს მოსახლეობას, რომ მაქსიმალურად ჩაიტარონ ანტიგენის სწრაფი ტესტი. ის განმარტავს, რომ ამ ტესტის ჩატარებისას ნაკლები დაბრკოლებებია და არ არის სავალდებულო ოჯახის ექიმის მიმართვა, თუკი გამოხატულია სიმპტომები. მისივე თქმით, ტესტის ჩატარება შესაძლებელია პოლიკლინიკებსა და სტაციონარულ დაწესებულებებში.

"მინდა მივმართო მოსახლეობას, რომ ფართოთ ისარგებლონ ამ შეთავაზებით, მათთვის კიდევ უფრო მეტად გაიოლდება და ხელმისაწვდომი გახდება ტესტირება. ნებისმიერ ადამიანს, ვისაც აქვსს კოვიდისთვის დამახასიათებელი სიმპტომები — ტემპერატურის მატება, სუნთქვის გაძნელება, ხველა, სურდო, ყელის ტკივილი ან სხვა იშვიათი სიმპტომები, ყნოსვის და გემონების დაკარგვა და ა.შ. — შეუძლია, რომ დაუყოვნებლივ მიმართოს პოლიკლინიკებს და სხვა სტაციონარულ დაწესებულებებს და ჩაუტარდებათ ტესტირება.

ამ ტესტირების ჩატარებისას ბარიერები მსუბუქდება სამედიცინო დაწესებულებისთვის და მოქალაქისთვის. ანუ სავალდებულო აღარ იქნება ოჯახის ექიმის გადამისამართება. შესაძლოა, ოჯახის ექიმმა გადაამისამართოს, ან თვითდინებით მივიდნენ კლინიკებში", — განაცხადა მან.

გამყრელიძის განმარტებით, თუ ტესტის პასუხი დადებითია, სასურველია ჩატარდეს კონსულტაცია ოჯახის ექიმთან, ან ისარგებლონ იმ ე.წ. სამახსოვროთი, რომელსაც ადგილზე გადასცემენ და სადაც განმარტებულია რეკომენდაციები.

ჯანდაცვის მინისტრის მოადგილე, თამარ გაბუნია განმარტავს, რომ ანტიგენის ტესტს მაღალი მგრძნობელობა და სარწმუნო შედეგი სიმპტომების გამოვლენის შემდეგ აქვს, ამიტომ უსიმპტომო პირებისთვის მისი ჩატარება რეკომენდირებული არ არის.

"წინასწარ ისიც ვიცით რა მახასიათებლები აქვს ტესტს, ამიტომ ტესტი ყველაზე მგრნობიარე და სარწმუნო არის სიმპტომიან პირებში. როდესაც ადამიანს სიმპტომი არ აქვს და ინტერესის გამო სურს სწრაფი ანტიგენ ტესტის ჩატარება, რა თქმა უნდა, არ არის ინფორმატიული და ამას არცერთ შემთხვევაში არ ვურჩევთ", — განაცხადა გაბუნიამ.

მისი თქმით, ანტიგენის ტესტი ქვეყანაში დაახლოებით 300-მდე დაწესებულებაში ჩატარდება და აქცენტი იქნება დიდ ქალაქებზე: თბილისი, ქუთაისი, ბათუმი, რუსთავი, ფოთი.

2 დეკემბერს ცნობილი გახდა, რომ მთავრობა ანტიგენზე დამყარებული სწრაფი ტესტების გამოყენებას აფართოებს და ეს ტესტი ჩაუტარდება ყველას, ვინც სტაციონარში მოხვდება, განურჩევლად იმისა, აქვს თუ არა კორონავირუსის სიმპტომები. პანდემიის დასაწყისში უწყებათაშორისი საკოორდინაციო საბჭოს წევრები ამ ტესტებს სკეპტიკურად უყურებდნენ და აცხადებდნენ, რომ მათი სანდოობა კითხვის ნიშნის ქვეშ დგას და ის PCR ტესტით უნდა გადამოწმდეს, რაც არც დროს ზოგავს და არც რესურს. ქვეყანაში ვირუსის გავრცელების მეათე თვეზე მიდგომა შეიცვალა.

დაავადებათა კონტროლის ცენტრის დირექტორმა, ამირან გამყრელიძემ განმარტა, რომ ანტიგენზე დამყარებული ტესტის შედეგის აღიარებისა და გადამოწმების მეთოდი შეიცვალა და ამიერიდან ამ ტესტის პასუხი საბოლოოდ მიიჩნევა, თუ მას ექიმი არ დააყენებს ეჭვქვეშ. კერძოდ, გამყრელიძე განმარტავს, რომ ანტიგენის ტესტი PCR-ზე მხოლოდ ორ შემთხვევაში გადამოწმდება.