ქართული ოცნების მდივანმა, ირაკლი კობახიძემ განაცხადა, რომ ოპოზიციას კონკრეტულ ტელევიზიაში, რუსთავი 2-ში სთავაზობს, რადგან დებატების ინიციატივა სწორედ ამ ტელევიზიას ეკუთნის.

"გამომდინარე იქიდან, რომ პირველად ეს ინიციატივა გაჟღერდა რუსთავი 2-ში, მზად ვართ, მათ მივანიჭოთ დებატების ორგანიზების ექსკლუზივი. მშვიდ გარემოში გავცვალოთ არგუმენტები, რამდენად იყო ხარვეზები გამოვლენილი ამ არჩევნებში. თუ მათ არ აქვთ შიში სიმართლის მიმართ, უნდა დათანხმდნენ კლასიკურ დებატებს", — განაცხადა ირაკლი კობახიძემ.

გუშინ, რუსთავი 2-ის ეთერში მიწვეულ ოპოზიციის ლიდერებს, შესთავაზეს დებატები ხელისუფლებასთან, რაზეც ოპოზიციის პასუხი იყო, რომ დებატები უფრო მასშტაბური ფორმის იყოს და კითხვის დასმის საშუალება ყველა ტელევიზიის ჟურნალისტს მიეცეს. დებატების ამ ფორმას კი კობახიძემ შოუ უწოდა და ალტერნატივად ოპოზიციას დღეს "კლასიკური" დებატები შესთავაზა.