პარლამენტში მმართველი გუნდის ყოფილი წევრი და დამოუკიდებელი დეპუტატი, თამარ ჩუგოშვილი ამბობს, რომ მოლაპარაკებებში კიდევ ერთხელ ელჩების ჩართვა პოლიტიკის უმწიფობაზე მიუთითებს. ამის შესახებ მან TV პირველის ეთერში ისაუბრა.

"ჩვენი პოლიტიკოსების სირცხვილია, რომ ყოველ ჯერზე გამშველებელი სჭირდებათ და ვიღაც, ვინც დასვამს, დალაპარაკებას და მოდერატორი იქნება, რადგან ერთმანეთთან ლაპარაკი არ შეუძლიათ. ეს ძალიან სამწუხაროა", — ჩუგოშვილი.

მისივე თქმით, ამჟამინდელი მოლაპარაკებები ბევრად რთულია ვიდრე წინა, რომელიც პროპორციულ საარჩევნო სისტემას შეეხებოდა შეეხებოდა და რომელშიც თვითონაც ჩართული იყო. როგორც ჩუგოშვილი ამბობს, მაშინ უფრო შესაძლებელი და რეალისტური იყო კონკრეტული შედეგებით მოლაპარაკებების დასრულება.

"ამ მოლაპარაკებების სპეციფიკა ისაა, რომ დრო არის ძალიან ცოტა. არ არის ბევრი დრო დარჩენილი ამ მოლაპარაკებებისთვის. მალე ჩატარდება მეორე ტურები. ხელისუფლება ატარებს ამ მეორე ტურებს. ამბობს, რომ არც არაფერი, თუ სხვა არავინ მონაწილეობას არ მიიღებს, მარტო ჩვენ მივიღებთ მონაწილეობას. სადღაც ორ კვირაში შეჯამდება და ჩაინიშნა პირველი სხდომა და დამთავრდება. დრო ძალიან ცოტაა", — ამბობს ჩუგოშვილი.

ოპოზიცია არ აღიარებს 31 ოქტომბერს ჩატარებული არჩევნების შედეგებს. სწორედ ამის გამო ისინი საპროტესტო აქციებს აწყობენ. მათი მოთხოვნა ცესკოს თავმჯდომარის, თამარ ჟვანიას გადადგომა, რიგგარეშე არჩევნების ჩატარება და პოლიტმატიმრების გათავისუფლებაა.

არჩევნებთან დაკავშირებით ელჩების შუამავლობით ხელისუფლებასა და ოპოზიციას შორის მოლაპარაკებები დაიწყო. შეხვედრები უკვე გაიმართა აშშ-ს ელჩის, კელი დეგნანის რეზიდენციაში და მას ევროკავშირის ელჩი, კარლ ჰარცელიც ესწრებოდა.