აზერბაიჯანის პრეზიდენტი საკუთარ ტვიტერზე მთიან ყარაბაღში ცეცხლის შეწყვეტის შესახებ მიღებულ შეთანხმებას აღნიშნავს და ამბობს, რომ ეს სომხეთის კაპიტულაციას ნიშნავს.

"ეს ისტორიული დღეა. დასრულებულია სომხეთ-აზერბაიჯანი მთიანი ყარაბაღის კონფლიქტი. ამ განცხადებას აქვს ისტორიული მნიშვნელობა! ეს განცხადება ასრულებს მრავალწლიან ოკუპაციას! ეს განცხადება არის ჩვენი დიდებული გამარჯვება", — აცხადებს ალიევი.

გარდა ამისა, აზერბაიჯანის პრეზიდენტი საუბრობს იმაზე, თუ რას მიაღწია აზერბაიჯანმა ამ განცხადებით

"მივაღწიეთ, რომ სომხეთი იძულებული გახდა დაებრუნებინა აღდამი, ლაჩინი, ქალბაჯარი. კიდევ ერთი მნიშვნელოვანია საკითხია ნახიჩევანთან კომუნიკაციის პირობები, რომელიც ჩემი დაჟინებული მოთხოვნით დაემატა", — აღნიშნავს ილჰამ ალიევი.

ამასთან, ალიევი აცხადებს იმასაც, რომ აღნიშნულ განცხადებაში არს არის საკითხი მთიანი ყარაბაღის სატუსის შესახებ.

ასევე, ტვიტერით ავრცელებს პოსტს, რომ ბედნიერია მიღებული გადაწყვეტილებით და ბედნიერია, რომ ეს სიახლე საკუთარ ხალხს აცნობა.

სომხეთმა, აზერბაიჯანმა და რუსეთმა მთიან ყარაბაღში ცეცხლის შეწყვეტის შესახებ შეთანხმებას 9 ნოემბრის ღამით მოწერეს. შეთანხმების ფრაგლებში მთიან ყარაბაღში რუსი სამშვიდობოები განლაგდებიან.

"ჩემთვის და ყველა ჩვენგანისთვის ძალიან რთული გადაწყვეტილება მივიღე. რუსეთისა და აზერბაიჯანის პრეზიდენტებთან ხელი მოვაწერე დეკლარაციას პირველი საათიდან ყარაბაღში ომის შეწყვეტის შესახებ. დეკლარაციის ტექსტი, რომელიც გამოქვეყნდა უკიდურესად მტკივნეულია პირადად ჩემთვის და ჩემი ხალხისთვის. ეს გადაწყვეტილება არსებული სიტუაციის ღრმა ანალიზის საფუძველზე მივიღე. ასევე, რწმენით, რომ ეს საუკეთესო შესაძლო შედეგია. ამ ყველაფრის შესახებ უახლოეს დღეებში მივმართავ ერს. ეს არ არის გამარჯვება, მაგრამ დამარცხებაც არ არსებობს, სანამ საკუთარ თავს არ თვლი დამარცხებულად. ჩვენ თავს არასოდეს ვცნობთ დამარცხებულებად და ეს უნდა გახდეს ჩვენი ეროვნული ერთიანობის ამოსავალი წერტილი", — განაცხადა ფაშინიანმა.

ცეცხლის შეწყვეტის შესახებ შეთანხმება მოსკოვის დროით 10 ნოემბერს 00:00 საათიდან ამოქმედდება.

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ერთმანეთს ადანაშაულებედნენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებდა.

რუსეთის შუამავლობით, სომხეთი და აზერბაიჯანი ჰუმანიტარული მიზნით ცეცხლის შეწყვეტაზე ორჯერ შეთანხმდნენ, თუმცა ზავი ორივეჯერ მალევე დაირღვა. ბაქომ და ერევანმა ცეცხლის შეწყვეტაში ისევ ერთმანეთი დაადანაშაულეს.

DW.com-ის ინფორმაციით, ყარაბაღის კონფლიქტისას სომხეთის მხრიდან 974 სამხედრო და 37 მშვიდობიანი მოქალაქე დაიღუპა. აზერბაიჯანის მხრიდან დაღუპული სამხედროების ზუსტი რიცხვი უცნობია, თუმცა ბაქო აცხადებს, რომ მათი მხრიდან 56 მშვიდობიანი მოქალაქე დაიღუპა, 300-ზე მეტი კი დაშავდა.