შინაგან საქმეთა სამინისტრომ აქციაზე 4 პირის დაკავება დაადასტურა და განაცხადა, რომ საქმეზე გამოძიება ადმინისტრაციულ სამართალდარღვევათა კოდექსის 166-ე და 173-ე მუხლებით დაიწყო, რაც წვრილმან ხულიგნობასა და პოლიციის კანონიერი განკარგულებისადმი ან მოთხოვნისადმი დაუმორჩილებლობას გულისხმობს.

პარლამენტთან მიმდინარე აქციაზე რამდენიმე აქტივისტი დააკავეს. როგორც ერთ-ერთი სამოქალაქო აქტივისტი, მარიამ გეგუჩაძე ამბობს, დაკავებულები არიან ლექსო მაჭავარიანი, გიორგი მჟავანაძე და ნოდარ რუხაძე. მისი თქმით, დაკავებები მას შემდეგ დაიწყო, რაც აქციაზე გათბობის მიზნით შეშის შეტანა სცადეს.

"დაკავევები დაიწყო იმის გამო, რომ პირდაპირი მნიშვნელობით შემოგვქონდა სამი ცალი შეშა. ამის შემოტანის მიზეზი იყო გათბობა, ქართულმა ოცნებამ კი შეშა გახადა კრიმინალური საგანი. თავიდან დააკავეს, ლექსო მაჭავარიანი, შემდეგ გვერდზე გამოიჭირეს გიორგი მჟავანაძე, რასაც შევესწარი, პირდაპირი მნიშვნელობით, 20 პოლიციელი მიათრევდა გიორგის და ანალოგიურად, დაიჭირეს ნოდარ რუხაძე. არავინ არ იცის მიზეზი თუ რატომ დააკავეს", — განაცხადა გეგუჩაძემ აქციაზე.

დღეს მოძრაობა სირცხვილია პარლამენტთან აქციას მართავს. მათი აქცია 22:00 საათიდან 05:00 საათამდეა დაგეგმილი. ეს აქცია გადაადგილების შეზღუდვის ამოქმედებასთან ერთად მიმდინარეობს. აქტივისტების განცხადებით, დღეს ისინი ამ შეზღუდვებს "დაუმორჩილებლობას" უცხადებენ.

საკოორდინაციო საბჭოს გადაწყვეტილებით, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდა. შეზღუდვა ვრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე.