მალაიზიის, ავსტრალიისა და ჩინეთის ხელისუფლებებმა ერთობლივად განაცხადეს, რომ ისინი წყვეტენ მალაიზიის ავიახაზების კუთვნილი ბოინგ 777-ის ძებნის ოპერაციას, რადგან მას რეალური შედეგი ამ დრომდე არ მოუტანია.

რეისი MH370 მალაიზიის დედაქალაქ კუალა ლუმპურიდან ჩინეთის დედაქალაქ პეკინში მიფრინავდა 2014 წლის 8 მარტს. ბორტზე 239 ადამიანი იმყოფებოდა. აფრენიდან 1 საათში თვითმფრინავთან ყოველგვარი კავშირი გაწყდა, რის შემდეგაც მის ძებნაში არაერთი სახელმწიფო ჩაერთო. ერთადერთი, რაც გამოძიებამ დანამდვილებით დაადგინა არის ის, რომ თვითმფრინავმა მარშრუტი შეიცვალა და გეზი ინდოეთის ოკეანის სამხრეთისკენ აიღო, სადაც რამდენიმესაათიანი ფრენის შემდეგ ჩამოვარდა. გაუჩინარებისა და ჩამოვარდნის მიზეზების შესახებ, არაერთი თეორიული ვერსია არსებობს, თუმცა ხელჩასაჭიდი ამ დრომდე არაფერია.

ძებნის ოპერაცია მიმდინარეობდა როგორც ჰაერიდან, ისე წყლის ქვეშ. სპეციალისტებმა დაათვალიერეს ინდოეთის ოკეანის ფსკერის 120 ათასი კვადრატული კილომეტრი, თუმცა თვითმფრინავს ვერ მიაგნეს. აფრიკის კონტინენტის აღმოსავლეთ სანაპიროსა და კუნძულ რეუნიონზე სხვადასხვა დროს იპოვეს სანაპიროზე გამორიყული თვითმფრინავის ფრაგმენტები, რომელთაგან რამდენიმე დადასტურებულად ეკუთვნის გაუჩინარებულ ბოინგს.

MH370-ის გაუჩინარება ავიაციის ისტორიაში ყველაზე იდუმალებით მოცული ამბავია. თვითმფრინავის ძებნაში დახარჯულმა რესურსმა რეკორდული თანხა შეადგინა და 150 მილიონ აშშ დოლარს გადააჭარბა.

დაღუპულთა ახლობლებში უკმაყოფილება გამოიწვია დღეს გავრცელებულმა ინფორმაციამ ძებნის ოპერაციის შეწყვეტის შესახებ. ისინი სამუშაოების გაგრძელებას ითხოვენ, თუმცა უშედეგოდ.