ლელოს გენერალური მდივანი, ბადრი ჯაფარიძე 31 ოქტომბრის არჩევნებზე საუბრობს. მისი თქმით, დარღვევები იმ დონისაა, რომ კონკრეტულ უბნებზე პირდაპირ იძლევა შედეგების გაუქმების საფუძველს.

"სამწუხაროდ, ჩვენ ვნახეთ, რომ ცესკოს მხრიდან ამ ფაქტებს არანაირი რეაგირება არ მოჰყოლია. დღევანდელი სასამართლოს მიმართ მოლოდინი ვერ იქნება დადებითი. ვიცით, რომ სასამართლო არის პოლიტიზირებული. ჩვენი ამოცანა რჩება, პირველი რიგის ამოცანად, რომ მოხდეს სასამართლოს დეპოლიტიზაცია და გათავისუფლება. ეს იყო ჩვენი წინა საარჩევნო პროგრამაც, რომლის განხორციელებაც გვსურს. ვმუშაობთ და ვიბრძვით იმისათვის, რომ დღეს ჩვენი ამომრჩევლების ხმები არ დაგვეკარგოს და ჩვენ შევძლოთ იმ დაპირებების შესრულება, რომელიც გავეცით წინა საარჩევნო პერიოდში", — განაცხადა ჯაფარიძემ.

პარტიის გენერალური მდივნის განცხადებით, საზოგადოებას უნდა ჰქონდეს მკაფიო წარმოდგენა რა ტიპის და რაოდენობის დარღვევები იყო საარჩევნო უბნებზე.

"შემაჯამებელ ხმებში ბიულეტენების რაოდენობა ჭარბობს ამომრჩეველთა რაოდენობას. კვლევის გარეშეც ნათელია, რომ საქმე გვქონდა, სამწუხაროდ, მასობრივ გაყალბებასთან. ლელოს და სხვა ოპოზიციური პარტიების მიერ მომზადებული საჩივრები უნდა იყოს გამჭვირვალედ შესწავლილი და პროცესში ჩავრთოთ თანამეგობრობა. მოსახლეობას და საზოგადოებას უნდა ჰქონდეს მკაფიო წარმოდგენა რა ტიპის დარღვევებზე და რა რაოდენობის დარღვევებზე ვსაუბრობთ. იმიტომ, რომ სხვა შემთხვევაში იგნორირება ამ საჩივრების და დარღვევების არსებობის ფაქტის იწვევს კრიზისის გაღრმავებას. ეს არის ყველაზე დიდი პრობლემა. ამიტომ ჩვენ ახლა უნდა ვიზრუნოთ იმაზე, რომ ჩვენი საზოგადოება იყოს ინფორმირებული დარღვევების მასშტაბზე მის ოდენობაზე და ხასიათზე", — აცხადებს ჯაფარიძე.