აშშ-ში საპრეზიდენტო არჩევნებზე ხმების დათვლა ჯერ დასრულებული არაა, თუმცა ხმების გადანაწილებას შეგვიძლია LIVE რეჟიმში ვადევნოთ. Politico-ს ინფორმაციით, ჯი ბაიდენმა ამომრჩეველთა ხმების რაოდენობით ყოფილი პრეზიდენტის, ბარაკ ობამას რეკორდი უკვე მოხსნა.

დემოკრატიული პარტიის კანდიდატს ამ ეტაპისთვის [10:58 საათი] 71 მილიონზე მეტი ხმა აქვს მიღებული. მან 2008 წლის ობამას შედეგს აჯობა, რომელმაც 69,5 მილიონი ხმა მიიღო. ამასთან, დონალდ ტრამპს ამ დროისთვის დაახლოებით 68 მილიონი ხმა აქვს მიღებული.

ტრამპსა და ბაიდენს შორის კონკურენცია საკმაოდ მჭიდროა. ჯერ რთულია იმის თქმა, თუ ვინ გახდება პრეზიდენტი. წინასწარი მონაცემებით, საარჩევნო კოლეგიაში ბაიდენიც ლიდერობს.

ამერიკის საარჩევნო სისტემიდან გამომდინარე ამომრჩეველთა ხმებით ლიდერობა გამარჯვებას არ ნიშნავს. 2016 წელს დონალდ ტრამპი ჰილარი კლინტონს ჩამორჩებოდა, თუმცა გადამწყვეტ შტატებში გამარჯვებით საარჩევნო კოლეგიაში გამარჯვებისთვის საჭირო ხმები დააგროვა.

აშშ არჩევნებთან დაკავშირებულ სიახლეებს LIVE რეჟიმში გაეცანით აქ. ასევე, ადევნეთ თვალი On.ge-ს ინტერაქტიულ რუკას.