გამოცემა Sknews-ის ცნობით, არალის მე-3 საარჩევნო უბანზე, ერთ-ერთ ამომრჩეველს ხმა არ მიაცემინეს. როგორც მოქალაქე მედიასთან განმარტავს, მისი გვარის გასწვრივ "გადასატანი ყუთი" ეწერა, ამიტომ მას კომისიის თავმჯდომარემ უბანი დაატოვებინა.

სტატიაში ვკითხულობთ, რომ მოქალაქე იმ სასტუმროში მუშაობდა, რომლის კოვიდ-სასტუმროდ გადაკეთებაც იგეგმებოდა, რის გამოც პერსონალი გადასატანი ყუთის სიაში შეიყვანეს. ის ჰყვება, რომ მოგვიანებით, სასტუმრო აღარ გადაკეთებულა, ხოლო ტურიზმის ეროვნულმა ადმინისტრაციამ მათ მისცა ცნობები, რის მიხედვითაც, ისინი თავიანთ უბნებზე ხმის მიცემას შეძლებდნენ.

"არ მაძლევს ხმის მიცემის უფლებას, იმიტომ, რომ საარჩევნო სიაში ჩემი გვარის გასწვრი აწერია გადასატანი ყუთი. ჩემი ცნობაც არ უნახავს, მეუბნება შენ აქ დააინფიცირებ ხალხსო. ყვირის გააძევეთ ეს ბიჭი, გადაიყვანეთ კარანტინში, საზოგადოებისთვის საშიშიაო", — განუცხადა მედიას მოქალაქემ.

Sknews-ის ცნობით, სხვა თანამშრომლებს მსგავსი პრობლემა არ შექმნიათ. როგორც სტატიაშია ნათქვამი, აღნიშნულმა პიროვნებამ ცესკოს ცხელ ხაზზე დარეკა, თუმცა ხმის მიცემის უფლება მას მაინც არ მისცეს.

"კომისიის თავმჯდომარე სამხრეთის კარიბჭეს არ უკეთებს კომენტარს, ამბობს რომ დილით მასზე განაწყენდა, აღელვებულია და დრო ჭირდება, რომ დამშვიდდეს", — ვკითხულობთ სტატიაში.

2020 წლის საპარლამენტო არჩევნების შესახებ

დღეს 31 ოქტომბერს, საქართველოს პარლამენტის არჩევნები იმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ტარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია, ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.

მთელი ქვეყნის მასშტაბით საარჩევნო უბნები 8 საათზე გაიხსნა და ხმის მიცემის პროცესი დაიწყო. უბნები დღეს 20:00 საათზე დაიხურება.

ისტორიაში პირველად, არჩევნები პროპორციულთან მიახლოებული, 120/30-ზე სისტემით გაიმართება.

გაიგეთ მეტი არჩევნებზე: