ლელოს ლიდერმა, ბადრი ჯაფარიძემ საკუთარი ხმა უკვე დააფიქსირა. ხმის მიცემის შემდეგ მან მოქალაქეებს არჩევნებზე მოსვლა მოუწოდა და თქვა, რომ მან ხმა ვარდნის შეჩერებას, ცვლილებებსა და ქვეყანაში სრულიად ახალი პოლიტიკის გატარებას მისცმა.

"ეს არის ჩვენი ქვეყნის თანამედროვე ისტორიაში ერთ-ერთი გადამწყვეტი არჩევნები, იმისათვის, რომ შევაჩეროთ ქვეყნის ვარდნა, იმისათვის, რომ დავიწყოთ ძლიერი სახელმწიფო მშენებლობა. ამიტომ ყველა მოქალაქეს მოვუწოდებ, დღეს ხმა მისცეს მისი ქვეყნისა და ოჯახების მომავალს და იმას, რომ ჩვენ ერთხელ და სამუდამოდ თავი დავაღწიოთ ყველა იმ კრიზისს და ყველა იმ გამოწვევას, რომლის წინაშეც ახლა ვდგავართ. მე მივეცი ხმა ვარდნის შეჩერებას, ცვლილებებს და ქვეყანაში სრულიად ახალი პოლიტიკის გადატარებას", — განაცხადა ჯაფარიძემ.

დღეს 31 ოქტომბერს, საქართველოს პარლამენტის არჩევნები იმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ტარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია, ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.