ოქროს გლობუსის ცერემონიალზე მერილ სტრიპის თამამმა სიტყვამ დიდი აჟიოტაჟი გამოიწვია მსოფლიო მედიაში. მსახიობმა ხაზი გაუსვა ეთნიკური მრავალფეროვნების საჭიროებას, რითაც ირიბად გააკრიტიკა ტრამპის საგარეო პოლიტიკა. გამოსვლაში ასევე ნახსენები იყო ამერიკის ამჟამინდელი პრეზიდენტის მიერ შშმ რეპორტიორის დაცინვის ფაქტი.

"როცა დამცირების ინსტინქტს საჯარო პირი ავლენს, ეს ყველა ადამიანის გონებაში ილექება. უპატივცემულობა იწვევს უპატივცემულობას. როდესაც ძლევამოსილი ადამიანი თავის გავლენას სხვების დასაჩაგრად იყენებს, ჩვენ ყველანი ვმარცხდებით", - ამბობდა მერილ სტრიპი საკუთარ სიტყვაში.

შოუს დასრულების შემდეგ ტრამპის გამოხმაურებამ არ დააყოვნა და მან საკუთარი პოზიცია ტვიტერზე დააფიქსირა.

"მერილ სტრიპი ჰოლივუდის ერთ-ერთი ყველაზე ზედმეტად დაფასებული მსახიობია. არ მიცნობს, მაგრამ თავს დამესხა გუშინ, ოქროს გლობუსის დაჯილდოებაზე. ის არის....."

როგორც ჩანს, დონალდ ტრამპი სულ სხვანაირად აფასებდა მერილ სტრიპის შემოქმედებას 2015 წელს. The Hollywood Reporter-თან ინტერვიუს დროს დონალდ ტრამპს ჟურნალისტმა ჯენიკა მინმა ჰკითხა, თუ ვინ იყო მისი საყვარელი მსახიობი, რაზეც დონალდ ტრამპმა ასე უპასუხა:

"ჯულია რობერტსი ძალიან კარგი მსახიობია. მერილ სტრიპიც შეუდარებელია და თან არაჩვეულებრივი ადამიანიც არის."

შეგახსენებთ, რომ მერილ სტრიპი და ჯულია რობერტსი აქტიურად უჭერდნენ მხარს ჰილარი კლინტონს 2016 წლის საპრეზიდენტო არჩევნებში.