საქართველოს შინაგან საქმეთა სამინისტროს ინფორმაციით, ქობულეთში ინკასატორის ძარცვისთვის ბრალდებული დააკავეს.

"ბრალდებული ქალაქ ქობულეთში, საქართველოს ბანკის სერვისცენტრის მიმდებარედ, თავს დაესხა შპს დაირექტ დებიტ ჯორჯიას ინკასატორს, რომელსაც ამავე კომპანიის კუთვნილი ფული — 55 000-მდე ლარი ძალადობის გამოყენებით გასტაცა და შემთხვევის ადგილიდან მიიმალა", — აცხადებენ უწყებაში.

მათივე ინფორმაციით, ბრალდებული ქობულეთში დააკავეს და პოლიციამ, მის საცხოვრებელ სახლში ჩატარებული ჩხრეკის შედეგად, ნაძარცვი თანხა ნივთმტკიცების სახით ამოიღო.

ქობულეთში ინკასატორი 22 ოქტომბერს გაძარცვეს. შემთხვევა საქართველოს ბანკის მიმდებარედ მოხდა, თუმცა On.ge-ს ბანკში უთხრეს, დაყაჩაღებული ინკასატორი მათი ბანკის თანამშრომელი არ არის. კომპანია, რომელსაც ინკასატორი წარმოადგენს, საქართველოს ბანკის პარტიონიორია.

ძარცვის ფაქტზე გამოძიება საქართველოს სისხლის სამართლის კოდექსის 178-ე მუხლის მე-3 და მე-4 ნაწილებით მიმდინარეობს. დანაშაული 7-დან 11 წლამდე ვადით თავისუფლების აღკვეთას ითვალისწინებს.