ქართული ოცნების გენერალურმა მდივანმა, ირაკლი კობახიძემ ზუგდიდში მიმდინარე სპეცოპერაციისას პრემიერისთვის კითხვების დასმის გამო მთავარი არხი და TV პირველი გააკრიტიკა და მათ რუსულ ენაზე "გლავკანალი" და "პერვი კანალი" უწოდა.

"რაც შეეხება მედიასაშუალებებს, ერთი, რომ იყო უპასუხისმგებლო ქმედებები და კონკრეტული ქმედებები სისხლის სამართლის დანაშაულის ნიშნებსაც კი შეიაცვდა. ამას გეუბნებით, როგორც იურისტი.

როდესაც ასეთი მძიმე ვითარებაა და 19 ადამიანია გასათავისუფლებელი და თქვენი ჟურნალისტი, გლავკანალის და პერვი კანალის ჟურნალისტი, მიდის პრემიერ გახარიასთან და ეკითხება დანაშაულის სტატისტიკის შესახებ, ეს არის სირცხვილი", — განაცხადა მან.

ზუგდიდში შეიარაღებულ თავდასხმაზე საუბრისას, ჟურნალისტებმა პრემიერს ქვეყანაში კრიმინალის სავარაუდო ზრდის შესახებ კითხეს. გახარიას განცხადებით, საერთო ჯამში დანაშაულების ზრდა არ ნიშნავს იმას, რომ ქვეყანაში კრიმინალი გაიზარდა.

"რაც შეეხება კრიმინალს, ნახეთ სტატისტიკა და ციფრები, არის გარკვეული დანაშაული, სადაც ზრდა გვაქვს. რაც შეეხება საერთოდ კრიმინალს, სტატისტიკას რაც შეეხება, იქ ბევრი ისეთი დანაშაულია, რაც 3-4 წლის წინ როგორც დანაშაული, კვალიფიცირებული არ იყო. საერთო ჯამური ზრდა იმას არ ნიშნავს, რომ კრიმინალი ქვეყანაში გაიზარდა", — განაცხადა გახარიამ.

ზუგდიდში, საქართველოს ბანკში შეიარაღებული პირი შეიჭრა.

გაიგეთ მეტი: