დიდუბეში დამოუკიდებელი მაჟორიტარობის კანდიდატმა, ანა დოლიძემ პარასკევს შინაგან საქმეთა სამინისტროს მიმართა. დოლიძის განცხადებით, მას უთვალთვალებენ და პოლიტიკური კამპანიის დროს ფოტო-ვიდეოს უღებენ, რაშიც სახელმწიფო უსაფრთხოების სამსახურსა და გიორგი ვოლსკის შტაბს ადანაშაულებს.

დღეს ანა დოლიძე შსს-ში დაიბარეს. გასაუბრების შემდეგ, დოლიძემ განაცხადა, რომ გამოძიების დაწყების იმედი არ აქვს და სკეპტიკურადაა განწყობილი.

"შაბათს მთელი დღით აგვედევნა მანქანა, რომლის სერია და ნომერიც მივაწოდე დღეს, წინა დღეებში კი ფოტო-ვიდეოს გვიღებდნენ. ასევე, გუშინ ფეისბუქით მოქალაქისგან მივიღე მუქარის წერილი ტექსტით — "არ გაბედოთ გამარჯვება, თორემ ჩემი ხელით დაგაჭრით თავებს". ტროლს არ ჰგავს, მაგრამ არ ვიცით, ვინ არის", — განაცხადა ანა დოლიძემ.

დოლიძის თქმით, გამოძიებას არავითარი საშუალება არ აქვს, თქვას, რომ ვერ დაადგენს იმ პირებს და ვერ გამოიძიებს, რადგან დეტალური მასალა მიაწოდა.

ანა დოლიძის ბრალდებას გიორგი ვოლსკიმ უპასუხა და აღნიშნა, რომ დოლიძეს ეს საკუთარი თავის პოპულარიზაციისთვის სჭირდება. ამაზე კი ანა დოლიძემ განაცხადა, რომ ვოლსკის ეს პასუხი იმ ნარატივის გაგრძელებაა რომ, თითქოს, ადამიანებმა თვითონ იწამეს თავი, ნაციონალები თვითონ იცემენ თავს და ახლა დოლიძე საკუთარ თავს, თითქოს, თვითონ დასდევს.