საზოგადოებრივი მაუწყებლის ყოფილი დირექტორი, გიორგი ბარათაშვილი, რომელმაც თანამდებობა არხზე „ახალი სისხლის“ მოსვლის მოტივით დატოვა, ამ პოსტზე მაღლაფერიძის არჩევის შეფასებისგან თავს იკავებს.

კითხვაზე, როგორ აფასებს ვასილ მაღლაფერიძის საქმიანობას და არის თუ არა ის ტელევიზიისთვის „ახალი სისხლი“, გიორგი ბარათაშვილმა ასე უპასუხა:

„ახალი სისხლი ნამდვილად არის ტელევიზიისთვის იმიტომ, რომ გარედან მოსული ადამიანია, მაგრამ რას გააკეთებს და როგორ, მოდი, მერე შევაფასოთ. მე ადამიანის წარსული რას და როგორ აკეთებდა, მე კარგად არ ვიცნობ ვასილის [მაღლაფერიძის] მოღვაწეობას, ამიტომ ვიძახი, მოდი, ვნახოთ, რას გააკეთებს საზოგადოებრივ მაუწყებელში.“

მისი თქმით, დღეს საქართველოში მედია არის თავისუფალი და საზოგადოებრივ მაუწყებელს ვერავინ დააბრუნებს ძველ დროში.

„მე ჩემი მაგალითიდან შემიძლია გითხრა, არ ყოფილა არანაირი მცდელობა ხელისუფლების მხრიდან, რომ ჩარეულიყო საზოგადოებრივი მაუწყებლის საქმიანობაში,“ - თქვა არგუმენტად საზოგადოებრივი მაუწყებლის ყოფილმა გენერალურმა დირექტორმა.

დღეს სამეურვეო საბჭომ საზოგადოებრივი მაუწყებლის გენერალურ დირექტორად ვასილ მაღლაფერიძე 6 ხმით აირჩია. სამეურვეო საბჭოს წევრი, სულხან სალაძე ფიქრობს, რომ ვასილ მაღლაფერიძე ყველაზე ცუდი კანდიდატია. კიდევ ერთმა წევრმა, ქეთი მსხილაძემ On.ge-ს უთხრა, რომ ახალი დირექტორის მიმართ კითხვის ნიშნები აქვს.

ბარათაშვილმა თანამდებობა 21 ნოემბერს დატოვა, მაშინ განაცხადა, რომ სამსახურთან დაკავშირებით ახალი გეგმები და შემოთავაზება ჰქონდა. თუმცა, ამ დრომდე არ მუშაობს.