საზოგადოებრივი მაუწყებლის სამეურვეო საბჭოს წევრი, სულხან სალაძე მიიჩნევს, რომ დირექტორი კონკურსში მონაწილე 5 კანდიდატიდან ყველაზე ცუდი - ვასილ მაღლაფერიძე გახდა. ამის შესახებ მან On.ge-ს განუცხადა.

მისი თქმით, მაღლაფერიძემ გასაუბრებაზე პოლიტიკურ წარსულთან და ნეიტრალურობასთან დასმულ კითხვებს ვერ გასცა დამაკმაყოფილებელი პასუხები.

„ჩემთვის წარმოუდგენელი და გაუგებარია, რატომ დაუჭირა მხარი 6-მა წევრმა ვასილ მაღლაფერიძეს, თუ ეს არ იყო პოლიტიკური მოტივით ნაკარნახევი. მე სხვა აზრი არ მომდის,“- უთხრა სალაძემ, რომელმაც პირველ კენჭისყრაზე ნინო ზაუტაშვილს დაუჭირა მხარი, განმეორებითზე კი ბერძენიშვილს.

იმის მიუხედავად, რომ თიკო ბერძენიშვილს სალაძემ განმეორებით კენჭისყრაზე მხარი დაუჭირა, ბერძენიშვილს ორივე შემთხვევაში მხოლოდ 2 ხმა ჰქონდა.

სამეურვეო საბჭოს წევრი ამ გარემოებას ასე ხსნის: „მას, ვინც ფარულად უჭერდა ბერძენიშვილს მხარს, ხმების 4-4-ზე გაყოფის შემთხვევაში, არ ჰქონდა გარანტია, მზაობა, რომ ღიად ეთქვა, ვის უჭერდა მხარს,“ - აღნიშნა სალაძემ.

დღეს სამეურვეო საბჭომ საზოგადოებრივი მაუწყებლის გენერალურ დირექტორად ვასილ მაღლაფერიძე 6 ხმით აირჩია. სამეურვეო საბჭოს კიდევ ერთმა წევრმა, ქეთი მსხილაძემ On.ge-ს უთხრა, რომ ახალი დირექტორის მიმართ კითხვის ნიშნები აქვს. On.ge ცდილობს სამეურვეო საბჭოს სხვა წევრების კომენტარებიც შემოგთავაზოთ. ნაწილი სატელეფონო ზარებს არ პასუხობს, ნაწილთან დაკავშირება ვერ ხერხდება.

ვასილ მაღლაფერიძე, CV-ის მიხედვით, ამ დრომდე უმუშევარი იყო, ბოლოს კი საქართველოს ყოფილი პრემიერ-მინისტრის ბიძინა ივანიშვილი ოჯახის კუთვნილ ტელეკომპანია GDS-ში გადაცემა 2030-ის გენერალურ პროდიუსერად მუშაობდა. მისი მედიაში მუშაობა ტელეკომპანია GDS-ით არ შემოიფარგლება. სხვადასხვა დროს იყო TV9-ის, რომელიც ასევე ბიძინა ივანიშვილის ოჯახს ეკუთვნის, დირექტორის მოადგილე, ჟურნალ კალმასობას მთავარი რედაქტორი, გაზეთ კავკასიონის დამფუძნებელი, რედაქტორი და მთავარი კონსულტანტი. გარდა ამისა, 2 მოწვევის პარლამენტის წევრი, ნაციონალური მოძრაობის ხელისუფლებაში ყოფნის დროს გუბერნატორი და სახალხო დამცველის აპარატის ინფორმაციისა და პოლიტიკის დეპარტამენტის უფროსი.