"საქართველოს მედიასივრეცეში მიმდინარე მოვლენებში უმნიშვნელოვანესი იყო, რომ საზოგადოებრივი მაუწყებელი დარჩენილიყო ნეიტრალური" - ამის შესახებ საზოგადოებრივი მაუწყებლის სამეურვეო საბჭოს წევრმა, ქეთი მსხილაძემ ახალი გენერალური დირექტორის, ვასილ მაღლაფერიძის არჩევის შემდეგ On.ge-ს განუცხადა.

„მაღლაფერიძის მიმართ კითხვის ნიშნები მაქვს. თვითონ მაღლაფერიძე არასდროს მალავდა სიმპათიას მმართველი ხელისუფლების მიმართ და არც გუშინ დამალა. მას მიაჩნია, რომ GDS და TV9 ობიექტური ტელევიზიები იყო,“ - უთხრა On.ge-ს მსხილაძემ, რომელმაც კენჭისყრაზე არჩევანი, მისივე თქმით, დირექტორობის მოვალეობის შემსრულებელ თინათინ (თიკო) ბერძენიშვილზე შეაჩერა.

მსხილაძე ამბობს, რომ თინათინ (თიკო) ბერძენიშვილი ტელევიზიაში მიმდინარე რეფორმის დროს გამოკვეთილი მენეჯერი იყო, რომელიც კარგად ასრულებდა თავის სამუშაოს და დაადასტურა, რომ აქვს კარგი მენეჯერული თვისებები. სწორედ ეს გახდა მიზეზი, რის გამოც მსხილაძემ ბერძენიშვილს მხარი დაუჭირა:

„ბერძენიშვილი არის პროფესიონალი. ერკვევა ძალიან კარგად არამარტო ტელემაუწყებლობის და ჟურნალისტიკის სფეროში, არამედ ახალ ტექნოლოგიებშიც და აქვს ურთიერთობა ევროპის მაუწყებელთა კავშირთან. ბევრი რამ გააკეთა და დაამტკიცა, რომ შეუძლია. ეს რეფორმა რომ არ შეჩერებულიყო, რომელიც, მართალია ბევრი ხარვეზით, მაგრამ საზოგადოებრივი მაუწყებელი დგამს წინ ნაბიჯებს".

მისი თქმით, გენერალურ დირექტორებს შორის იყო კიდევ ერთი კანდიდატი - ნათია კუპრაშვილი, რომელსაც ის დაუჭერდა მხარს. თუმცა, ბერძენიშვილის არჩევით მაუწყებელში სტაბილურობის განცდა იქნებოდა.

გარდა ამისა, მსხილაძე ამბობს, რომ ბერძენიშვილთან საუბრისას მას არასდროს შექმნია შთაბეჭდილება, რომ დირექტორობის კანდიდატს ჰქონდა რაიმე სახის პოლიტიკური მიკერძოება.

დღეს სამეურვეო საბჭომ საზოგადოებრივი მაუწყებლის გენერალურ დირექტორად ვასილ მაღლაფერიძე 6 ხმით აირჩია.

ვასილ მაღლაფერიძე, CV-ის მიხედვით, ამ დრომდე უმუშევარი იყო, ბოლოს კი საქართველოს ყოფილი პრემიერ-მინისტრის ბიძინა ივანიშვილი ოჯახის კუთვნილ ტელეკომპანია GDS-ში გადაცემა 2030-ის გენერალურ პროდიუსერად მუშაობდა. მისი მედიაში მუშაობა ტელეკომპანია GDS-ით არ შემოიფარგლება. სხვადასხვა დროს იყო TV9-ის, რომელიც ასევე ბიძინა ივანიშვილის ოჯახს ეკუთვნის, დირექტორის მოადგილე, ჟურნალ კალმასობას მთავარი რედაქტორი, გაზეთ კავკასიონის დამფუძნებელი, რედაქტორი და მთავარი კონსულტანტი. გარდა ამისა, 2 მოწვევის პარლამენტის წევრი, ნაციონალური მოძრაობის ხელისუფლებაში ყოფნის დროს გუბერნატორი და სახალხო დამცველის აპარატის ინფორმაციისა და პოლიტიკის დეპარტამენტის უფროსი.