დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

კორონოვირუსის შემთხვევათა მატების გამო, ქვეყანაში შეზღუდვების დაწესებაზე საუბრისას NCDC-ის ხელმძღვანელმა, ამირან გამყრელიძემ განაცხადა, რომ საქართველოს 240 000 დიაბეტიანი ადამიანი ჰყავს, მაგრამ ქვეყანა არ იკეტება. ის, ასევე, ამბობს, რომ ლოკდაუნი არ ცხადდება გრიპის შემთხვევების მატების დროსაც.

"გრიპის დროს ჩვენ ხომ არ ვკეტავთ ქვეყანას. დიაბეტით ოფიციალურად რეგისტრიებული 120 000 ადამიანი გვყავს და ერთი მაგდენი არის, ვინც არ არის რეგისტრირებული. 240 000 დიაბეტით ინფიცირებულისთვის ქვეყანას ხომ არ ვკეტავთ", — აღნიშნა გამყრელიძემ მთავრობის სხდომის დასრულების შემდეგ გამართულ ბრიფინგზე.

მისივე თქმით, კორონავირუსის დაავადების მართვის პოლიტიკა გლობალურად და მათ შორის საქართველოშიც შეცვლილია. ის ამბობს, რომ დღეს მკაცრ ლოკდაუნებზე საუბარი აღარ არის, რადგან "ეკონომიკას ვერ გააჩერებ და ამიტომ, საჭიროა დანის პირზე სიარული".

15 ოქტომბერს საქართველოში კორონავირუსის 919 ახალი შემთხვევა დაფიქსირდა, გამოჯანმრთელდა — 208, გარდაიცვალა — 4.

ქვეყანაში სულ 14 440 დადასტურებული შემთხვევაა, მათგან 7 367 უკვე გამოჯანმრთელდა, გარდაიცვალა — 113.

ამ დროისთვის კარანტინის რეჟიმში 5 792 ადამიანი იმყოფება, სტაციონარში მეთვალყურეობის ქვეშ — 836, კოვიდ სასტუმროში 1 042 პირი მკურნალობს.