დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

საქართველოს პრემიემინისტრ გიორგი გახარიას განცხადებით, კორონავირუსთან ბრძოლაში როდესაც გადაწყვეტილებას იღებენ, ძირითადი ამოსავალი წერტილი ადამიანის სიცოხლე და ეკონომიკაა. მისი თქმით, პირველ ტალღაზე მძიმე ჩაკეტვების გადაწყვეტილება, ეკონომიკური ინტერესებიდან გამომდინარე მიიღეს.

"შეხედეთ ახლა საქართველოს ეკონომიკურ მაჩვენებლებს. ბევრად უკეთეს ფორმაშია, ვიდრე რეგიონში სხვა ქვეყნები. იმიტომ, რომ ჩვენ მაშინ ქვეყნის მძიმე ჩაკეტვით ვირუსის სწრაფი გავრცელების შეზღუდვა და ჯანდაცვის სისტემის კოლაფსის თავიდან არიდება შევძელით", — განაცხადა გახარიამ.

თუმცა, მისივე თქმით, ეს იმას არ ნიშნავს, რომ ქვეყნის ჯანდაცვის სისტემა ამოუწურავია. ამიტომ ის მოქალაქეების მხრიდან ჯანდაცვის უწყების მიერ შემუშავებული რეკომენდაციების დაცვის [პირბადის ტარება, სოციალური დისტანცია] აუცილებლობაზე საუბრობს.

"სამწუხაროდ, ბოლო დროს, ჩვენ მოვდუნდით და ეს ქალაქსა და მოქალაქეებსაც ეტყობათ, ბევრი არასაჭირო მობილობაა მსხვილ ქალაქებში და თავი უნდა შევიკავოთ", — ამბობს გახარია.

15 ოქტომბერს საქართველოში კორონავირუსის 919 ახალი შემთხვევა დაფიქსირდა, გამოჯანმრთელდა — 208, გარდაიცვალა — 4.

საქართველოში სულ 14 440 დადასტურებული შემთხვევაა, მათგან 7 367 უკვე გამოჯანმრთელდა, გარდაიცვალა — 113.

ამ დროისთვის კარანტინის რეჟიმში 5 792 ადამიანი იმყოფება, სტაციონარში მეთვალყურეობის ქვეშ — 836, კოვიდ სასტუმროში 1 042 პირი მკურნალობს.