პარტია ევროპული საქართველოს წევრის, ბესიკ დონაძის განცხადებით, ზუგდიდში ქართული ოცნების მაჟორიტარობის კანდიდატი, ირაკლი ჩიქოვანი წინასაარჩევნო აგიტაციაში ადმინისტრაციულ რესურსს იყენებს. კერძოდ, დონაძე საუბრობს ჩიქოვანის ოფიციალურ ფეისბუქ გვერდზე განთავსებულ ვიდეო რგოლებზე, სადაც სკოლების პედაგოგები და საბავშო ბაღის თანამშრომლები მონაწილეობენ.

ვიდეოებში, რომლებიც ქართული ოცნების კანდიდატის ფეისბუქ გვერდზე იძებნება, მითითებულია მონაწილე ადამიანების ვინაობა და პროფესიები, მათ შორის არიან მასწავლებლებიც. ისინი მმართველი პარტიის მხარდამჭერ განცხადებებს აკეთებენ.

ევროპული საქართველოს წარმომადგენელმა ამ საკითხზე ზუგდიდის #67 საოლქო საარჩევნო კომისიაში საჩივარი უკვე შეიტანა.

"ვიდეორგოლში კარგად ჩანს მაჟორიტარობის კანდიდატის საარჩევნო ნომერი და ყველა საჭირო საარჩევნო სიმბოლიკა. გთხოვთ დაუყონებლივ რეაგირებას წინასაარჩევნო აგიტაციაში დარღვევით მონაწილეობისთვის მოხდეს ყველა დამრღვევი პირის დაჯარიმება საქართველოს საარჩევნო კოდექსის 45-ე, 48-ე და 79-ე მუხლის შესაბამისად", — აღნიშნავს დონაძე.

On.ge-მ ესაუბრა ქართული ოცნების ზუგდიდის საარჩევნო შტაბის პრესსამსახურის წამომადგენელსაც. ირაკლი ლაგვილავას განცხადებით, კანონი არ დარღვეულა, რადგან ვიდეოები გადაიღეს არასამუშაო დროს და ეს იყო ნებაყოფლობითი.

"კანდიდატის საარჩევნო კამპანიაში, რომელიც მხარდამჭერ ვიდეოებსაც მოიცავს, ჩართულები არიან სხვადასხვა სფეროს და პროფესიის წარმომადგენლები. დარღვევას ადგილი არ ჰქონია, ხსენებულ ადამიანებს შეუძლიათ ნებაყოფლობით, მათი სურვილისამებრ მიიღონ მონაწილეობა მსგავს აქტივობებში. ამ ადამიანებს არასამუშაო დროს არ ეკრძალებათ პოლიტიკური აქტივობა, არ მომხდარა ადმინისტრაციული რესურსის გამოყენება, ჩაწერა მოხდა არასამუშაო დროს, არ გამოგვიყენებია არც სივრცე, მაგალითად, სკოლა. ევროპულ საქართველოს ვურჩევთ, რომ განცხადებების გაკეთებამდე კარგად გადახედონ კანონს და არ დაუშვან მსგავსი შეცდომები. განიხილავს ამას ალბათ შესაბამისი უწყება და მიიღებენ გადაწყვეტილებას, მაგრამ ჩვენ დარწმუნებული ვართ, რომ ეს არ არის კანონდარღვევა, გავიარეთ მანამდეც იურისტებთან და ახლაც გავიარეთ, ამიტომაც გეუბნებით ამ პასუხს", — განაცხადა ლაგვილავამ.

On.ge დაუკავშირდა ზუგდიდის საოლქო საარჩევნო კომისიას, სადაც ამბობენ, რომ განცხადების შესწავლა უკვე დაიწყეს. როგორც კომისიის თავმჯდომარე, მირანდა მესხი ამბობს, ვიდეო რგოლებში მონაწილე ადამიანებს ახსნა-განმარტებები ჩამოერთმევათ იმ მიზნით, რომ დადგინდეს, რა დროს მიიღეს მათ კამპანიაში მონაწილეობა. მირანდა მესხი მიუთითებს კანონდებლობაზე, რომლის მიხედვით, მასწავლებლებს საარჩევნო აგიტაციაში მონაწილეობა სამუშაო საათებში ეკრძალებათ.

"ეკრძალებათ სამუშაო საათებში, თავიანთი სამსახურეობრივი ფუნქცია-მოვალეობების შესრულების დროს აგიტაციაში მონაწილეობა და ჩართვა. შესწავლა უკვე დავიწყეთ, ვნახეთ ვიდეო რგოლები, ახსნა-განმარტებებს ჩამოვართმევთ და მივიღებთ შესაბამის გადაწყვეტილებას კანონით დადგენილ ვადებში, ათ სამუშაო დღეში", — აცხადებს ზუგდიდის #67 ზუგდიდის საოლქო საარჩევნო კომისიის თავმჯდომარე.