დონალდ ტრამპის მხარდამჭერი კიმბერლი ლოუ ცრუ ინფორმაციის გავრცელებაში ადანაშაულებს მათ, ვისთან ერთადაც საქართველოში "მშვიდობის სამიტის" ჩატარებას გეგმავდა და ვინც მას საქართველოში უმასპინძლა. ის სოციალურ ქსელში წერს, რომ ბესო შენგელია, გოგა ჭურღულია და ბაგრატ აკუჯბა იტყუებიან, როცა აცხადებენ, რომ აშშ-სგან რაიმე სახის ოფიციალური თანხმობა აქვთ მშვიდობის სამიტის ჩასატარებლად.

• ვინ არის კიმბერლი ლოუ და აქვს თუ არა კავშირი დონალდ ტრამპთან

ლოუ წერს, რომ ბესო დანელიამ "პირდაპირი მნიშვნელობით გადააგდო ის და "მშვიდობის სამიტი".

"მან [ბესო შენგელიამ] პირდაპირი მნიშვნელობით გადამაგდო მეც და "მშვიდობის სამიტიც". გამოიყენა ჩემი სახელი და რეპუტაცია საერთაშორისო დონეზე ჩართვისა და საკუთარი თავის ლეგიტიმურად წარმოსაჩენად", — წერს ის სოციალურ ქსელში.

ლოუ "ოფიციალური განცხადებაში" წერს, რომ "ამჟამად ტრამპის ადმინისტრაციას დიპლომატიური გზით არ გამოუთქვამს თავისი დამოკიდებულება საქართველოსთან მიმართებაში და მშვიდობის სამიტის ჩატარება შეუძლებელია მათი თანხმობის შესახებ". ლოუმ ისიც აღნიშნა, რომ გასული წლის ივნისში ის საქართველოში აშშ-ის ელჩის თანამდებობაზე განიხილებოდა.

"ჩემი სახელი წარდგენილი იყო აშშ-ის ელჩის თანამდებობაზე საქართველოში ივნისში, მას შემდეგ რაც ელჩი რობინ დანიგანი პენსიაზე გავიდა. მშვიდობის სამიტი კვლავ დაგეგმვის პროცესშია და გაიმართება შეერთებული შტატებისა და საქართველოს მთავრობის თანამშრომლობით, როგორც კი აშშ-ის ოფიციალური თანხმობა იქნება. მშვიდობის სამიტის წინადადება წარდგენილი იქნა აშშ-ის მთავრობის შესაბამისი არხებით, როგორც სახელმწიფო დეპარტამენტის, ასევე აღმასრულებელი ხელისუფლების მეშვეობით. ასევე, კონგრესის და აშშ-ის სენატის ყველა წევრს, მსოფლიო ლიდერებთან ერთად, ეცნობა ამის შესახებ. ამჟამად ტრამპის ადმინისტრაციას არ აქვს ჩამოყალიბებული თავისი პოზიცია საქართველოსთან დიპლომატიურ საკითხებზე და სანამ ასეთი ოფიციალური გადაწყვეტილება არ იქნება მიღებული, მშვიდობის სამიტის ჩატარება შეუძლებელია.

საქართველოში ვრცელდება შეცდომაში შემყვანი და დამახინჯებული Facebook პოსტები იმის შესახებ, რომ მშვიდობის სამიტთან დაკავშირებული დოკუმენტები წარადგინეს ბესო შენგელიამ, გოგა ჭურღულიამ და ბაგრატ აკუჯბამ, რომლებიც ისე იქცევიან, თითქოს უკვე აქვთ აშშ-სგან რაიმე სახის ოფიციალური თანხმობა ან რაიმე სახის ოფიციალური კავშირები აშშ-სთან. ეს ტყუილია და მე ამჟამად არანაირი კავშირი არ მაქვს ამ პირებთან, მათ შორის ბესო შენგელიასთან (თაღლითთან, რომელიც ცდილობს სხვისი სახელებისა და ავტორიტეტით ისარგებლოს). ამ პირებს არ აქვთ ოფიციალური კავშირები შეერთებულ შტატებთან და ატყუებენ ქართველ ხალხს და ასევე ცდილობენ დაუკავშირდნენ მთავრობის სხვა წევრებს, მაშინ როდესაც ამ პირებს არ აქვთ ოფიციალური თანამდებობა ან როლი.

ვუსურვებ ყველაფერს საუკეთესოს ქართველ ხალხს",— წერს კიმბერლი ლოუ სოციალურ ქსელში.

კიმბერლო ლოუს სოციალურ ქსელში გამოეხმაურა ბაგრატ აკუჯბა. მან დაწერა, რომ "მშვიდობის ფორუმის" დელეგატებმა მის ჩატარებაზე თანხმობა განაცხადეს. ეს ინფორმაცია შემდეგ ხელისუფლებას მიაწოდეს და "დაარეგისტრირეს, რეგისტრაციის ნომერიც მიიღეს და ელოდებიან პასუხს. თუ სახელმწიფო ამ ფორუმის ჩატარების აუცილებლობას დაინახავს, ჩატარდება".

"ვიდეოში რა ინფორმაციაც არის გავრცელებული დადასტურებული მხოლოდ არის ის, რომ დელეგატებმა თანხმობა განაცხადეს, თუ ხელისუფლებისგანაც იქნებოდა კეთილი ნება და ჩვენ ეს ინფო ჩვენს ხელისუფლებას მივაწოდეთ, დავარეგისტრირეთ, რეგისტრაციის ნომერიც მოგვცეს და ველოდებით ჩვენი ხელისუფლებიდან პასუხს. თუ სახელმწიფო ამ ფორუმის ჩატარების აუცილებლობას დაინახავს, ჩატარდება. თუ არა, არ ჩატარდება, ამაზეა საუბარი.
რაც შეეხება ბესო შენგელიას, როდესაც დამირეკა და მითხრა ეს ამბავი, რომ დასტური მივიღეთ, მე სიხარულით თვალიც კი არ დამიხუჭია და გვერდში დაგვიდექიო, დავდექი მის გვერდით.

ახლა ჩემი პოზიცია ეგეთია, მე ის ვიდეო ავიღე დროებით, მანამ სანამ ამ ადამიანების ავთენტურობის ანუ თანხმობის საკითხი არ დადასტურდება. და ეს უნდა გააკეთოს ბატონმა ბესომ საჯაროდ!

სხვა შემთხვევაში ჩემი პოზიცია ისევ უცვლელია ამ საკითხზე, მე მზად ვარ ყველგან და ყოველთვის დავიცვა ჩემი ქვეყნის ინტერესები.

არ ვიცი თქვენ ბესოზე გაბრაზებული ხართ, არ შევდივარ მაგ სიღრმეებში. ეს თქვენი პირადი საკითხია. მაგრამ არის მეორე საკითხი, როდესაც მომიხსენიებთ მეც, აქ ზომიერება გვმართებს ყველას და სწორად უნდა გაიგოთ ეს ყველაფერი.

ვეხმაურები ამ განცხადებას მხოლოდ იმიტომ, რომ "ტვ პირველში" გავიდა თქვენი პირველი პოსტი და არა მეორე, სადაც საუბრობთ ჩემზე, რომ შეცდომაში ვარ შეყვანილი. ეს ჩემთვისაც საინტერესოა და იმედია სიმართლე გაირკვევა", — წერს ბაგრატ აკუჯბა (სტილი დაცულია).

კიმბერლი ლოუ კიდევ ერთ პოსტში წერს, რომ არ აქვს ბაგრატ აკუჯბასთან დაკავშირების საშუალება, ამიტომ არ იცის, რა უთხრა მას ბესო შენგელიამ და ვარაუდობს, რომ "ბაგრატს კეთილი განზრახვა ჰქონდა, მაგრამ ვერ გაიგო აშშ-ს თანხმობის მიღებასთან დაკავშირებული სიტუაცია და შესრულებული სამუშაოს მოცულობა". "ასე რომ, ბაგრატ, ბოდიშს გიხდით, მაგრამ თქვენთან დაკავშირების საშუალება არ მაქვს და ისევ და ისევ, ვფიქრობ, კეთილი განზრახვა გაქვთ", — წერს კიმბერლი ლოუ.

შეგახსენებთ, რომ გასული წლის აპრილში კიმბერლი ლოუმ გაავრცელა ინფორმაცია, რომ 2025 წლის შემოდგომაზე საქართველოში მსოფლიო მშვიდობის სამიტი უნდა გამართულიყო, რომელზეც მოწვეულები იყვნენ: აშშ-ს, რუსეთის, ჩინეთისა და თურქეთის პრეზიდენტები: დონალდ ტრამპი, ვლადიმერ პუტინი, სი ძინპინი, რეჯეფ თაიფ ერდოღანი და მრავალი სხვა გავლენიანი პოლიტიკოსი და საზოგადო მოღვაწე.

• კიმბერლი ლოუ წერს, რომ მსოფლიო მშვიდობის სამიტზე, რომელიც საქართველოში შემოდგომაზე ჩატარდება, ტრამპი, პუტინი და სი ძინპინია მოწვეული

ლოუს ბრალდებებს ბესო შენგელია ჯერ არ გამოხმაურებია. დამატებით ინფორმაციის მიღების შემთხვევაში, სტატია განახლდება.

• მართლა რა ხდება ევროპაში კონსერვატორებზე? — კიმბერლი ლოუ მარინ ლე პენის სასამართლო განაჩენს ეხმაურება
• კიმბერლი ლოუ წერს, რომ ტრამპმა ყაველაშვილს წერილი მისი ჩართულობით მისწერა
• კიმბერლი ლოუმ "პირველი არხისთვის" მიცემულ ინტერვიუზე კომენტარი გააკეთა