პარტია მოქალაქეების ლიდერმა, ალეკო ელისაშვილმა დღევანდელ სასამართლო სხდომაზე განაცხადა, რომ საპატიმროში ზედეტად მკაცრ პირობებში იმყოფება და ამას სუს-ის უფროსს, მამუკა მდინარაძის პირად შურისძებას უკავშირებს.

ალეკო ელისაშვილი აუდიოჩანაწერში, რომელიც ტელეგრამ-არხებით ვრცელდება, ამბობს, რომ 1 თვის განმავლობაში არ აძლევდნენ საშუალებას, რომ ფრჩხილების საკვნეტი და პლასტმასის ტაშტი ეყიდა. "იმ ტაშტს, ოღონდ ნახმარს, აუცილებლად გავუგზავნი მამუკა მდინარაძეს, ოღონდ გავარკვევ დაბადების დღე როდის აქვს", — ამბობს ელისაშვილი გავრცელებულ ჩანაწერში.

"დავალება მიიღო ციხის ადმინისტრაციამ, რომ კიდევ უფრო მკაცრ პირობებში ვყოფილიყავი. გეტყვით ახლა რა არის მკაცრი პირობები — იქ არის პატიმრის ბარათი და ამ პატიმრის ბარათს რომ იღებ, შემდეგ არის მაღაზია, სადაც გაქვს უფლება ნებისმიერი ნივთი იყიდო, რაც არის პრეისკურანტში ჩამოწერილი. მეც მაქვს უფლება, რაც მინდა ის ვიყიდო. [...] 1 თვის განმავლობაში არ მაძლევდნენ საშუალებას, რომ ფრჩხილების საკვნეტი მეყიდა. პლასტმასის ტაშტი არის ძალიან მნიშვნელოვანი ნივთი საკანში პატიმრისთვის. მაქვს უფლება აბსოლუტურად. 1 თვე პლასტმასის ტაშტის ყიდვის უფლება არ მომცეს. შესაბამისად დაინტერესდით, რატომ არ მქონდა ერთი თვე. ბოლოს მოგცემთ ადამიანურად ერთ რჩევას.

მიუხედავად იმისა, რომ ამ მეკუთვნის, მიუხედავად იმისა, რომ თვითონ ციხის ადმინისტრაციამ გამაფრთხილა, რომ თავზეხელაღებულ პატიმრებთან ჩამსვამდნენ და ა.შ. ამის გარდა კიდევ უფრო მეტი არაფორმალური შეზღუდვები დამიწესეს, რათა უფრო მძიმე ვითარებაში ვყოფილიყავი, ეტყობა ეგონათ, რომ დეპრესია დამეწყებოდა, ტირილს დავიწყებდი, ვიტყოდი, რომ დედა მომენატრებოდა. ნურას უკაცრავად, მშვენივრად ვგრძნობ თავს. ძალიან მეცინება იმ ტაშტებზე. იმ ტაშტს, ოღონდ ნახმარს, აუცილებლად გავუგზავნი მამუკა მდინარაძეს, ოღონდ გავარკვევ დაბადების დღე როდის აქვს", — განაცხადა ელისაშვილმა სასამართლოზე.

ელისაშვილმა სხდომაზე განაცხადა, რომ ორი განცხადება აქვს გასაკეთებელი: მადლობას უხდის აქციების და მარშების მონაწილეებს და ოპოზიციას სთხოვს, რომ აღდგომამდე დადონ ზავი და ერთმანეთი არ ლანძღონ.

მოსამართლემ ელისაშვილს მოუწოდა, "სახე შეინარჩუნოს" და ამის შემდეგ ის დარბაზიდან გააძევა.

მოსამართლე მზია გარშაულაშვილმა ალეკო ელისაშვილის მიმართ შეფარდებული აღკვეთი ღონისძიება პატიმრობა ძალაში დატოვა.

ალეკო ელისაშვილი 29 ნოემბერს დააკავეს. შინაგან საქმეთა სამინისტროს ინფორმაციით, მან 29 ნოემბერს, დილით, თბილისის საქალაქო სასამართლოს კანცელარიის შენობის დაწვა სცადა. პროკურატურამ ელისაშვილს ბრალი 30 ნოემბერს წარუდგინა. უწყების მიერ გავრცელებულ ინფორმაციაში წერია, რომ პოლიტიკოსს ბრალი "თბილისის საქალაქო სასამართლოში ტერორისტული აქტის ჩადენის მცდელობის ფაქტზე" წარედგინა.