ეს მანეკენი შესაძლოა დიდად განსაკუთრებულად არ გამოიყურებოდეს, თუმცა ექსპერტების თქმით, ის არის წინ გადადგმული დიდი ნაბიჯი, რომელიც ავტოავარიებში ქალების უსაფრთხოებას მაქსიმალურად დაიცავს.

ჯერ კიდევ ნოემბერში მარეგულირებლებმა წარადგინეს THOR-05F — პირველი სატესტო მანეკენი, რომელიც სპეციალურად ქალის სხეულზეა მორგებულია.

ავტომწარმოებლები და მარეგულირებლები უკვე 25 წელია, რაც ამ საკითხზე აქტიურად ატარებენ კვლევებს. მიუხედავად ამისა, მხოლოდ ახლა შექმნეს ისეთი სატესტო მოდელი, რომელიც კაცი მანეკენის მოდელისგან შესამჩნევად განსხვავებულია.

THOR-05F-ის მოძრაობები უფრო ადამიანურია, ანატომიურად ზუსტია და სხეულის სამჯერ მეტი სენსორი აქვს. დეველოპერები ამბობენ, რომ მანეკენი ავტომწარმოებლებს უფრო დეტალურ მონაცემებს მიაწვდის, რომლებიც ქალებისთვის სპეციფიკური რისკების გადასაჭრელად არის საჭირო, მათ შორის, ინფორმაციას ქვედა კიდურების დაზიანებაზე.

გასულ კვირას, ეროვნული საგზაო მოძრაობის უსაფრთხოების ადმინისტრაციის მიერ გამოქვეყნებულ ახალ ანგარიშში ხაზი გაესვა იმ რისკებს, რომელთა წინაშეც შეიძლება აღმოჩნდნენ ქალები. ანგარიშში ვკითხულობთ, რომ მათ ავტოსაგზაო შემთხვევების დროს დაზიანებების უფრო მაღალი ალბათობა აქვთ, ვიდრე კაცებს.

ბოლო ათწლეულების განმავლობაში, სატესტო მანეკენების გამოყენებამ ხელი შეუწყო ავტომობილების უსაფრთხოების ზრდას. თუმცა მათი აწყობა და ტესტირება ძვირთან ერთად შრომატევადიცაა. ამასთანავე, ინდუსტრიის წარმომადგენლები ამბობენ, რომ ვირტუალური მოდელირება და კომპიუტერული სიმულაციები უფრო ეფექტურია, ვიდრე მანეკენები.

არსებული წესების შემუშავების პროცესის პირობებში, THOR-05F-ის ოფიციალურად დამტკიცებას — ავტომობილების უსაფრთხოების ტესტირებაში გამოსაყენებლად — შესაძლოა, რამდენიმე წელი დასჭირდეს. ვინაიდან, THOR-ის კაცი მანეკენის ვერსიის გამოყენების მოთხოვნა ჯერჯერობით არ დადასტურებულა, სავარაუდოა, რომ ფედერალური წესების შემუშავების პროცესს წლები დასჭირდება.

რაც შეეხება THOR-05F-ს, მისი ხერხემალი უფრო მოქნილია, 149 სანტიმეტრი სიმაღლისაა, 48 კილოგრამს იწონის და აღჭურვილია 150 სენსორით, რომლებსაც შეუძლიათ შეჯახების დროს სხეულის ისეთ ნაწილებზე ზეწოლის გაზომვა, როგორებიცაა ხელები, ბარძაყები, წვივები, მუხლები და ტერფები. სატესტო მანეკენის სხვა ვერსიები ამას ვერ აკეთებენ.

"ეს არის პირველი შემთხვევა, როდესაც შეგვიძლია დავინახოთ, ქალის სხეულის რომელი ნაწილი ზიანდება შეჯახების დროს", — ამბობს აშშ-ს ყოფილი კონგრესმენი, სუზან მოლინარი.

სატესტო მანეკენების ამჟამინდელ ვერსიებს, თითქმის, 40 წელია აქტიურად იყენებენ. პირველი მოდელი 1971 წელს გამოსული Hybrid I იყო. მოგვიანებით, 1980-იან და 1990-იან წლებში NHTSA-მ ორი მანეკენი, ვინსი და ლარი, შექმნა.

როგორც მანეკენის შემქმნელი, კრის ოკონორი ამბობს, მათი გამოყენება მომდევნო 20 წელი შეგვეძლება, მისი ღირებულება 1 მილიონი ამერიკული დოლარი იქნება.