ეუთოს საპარლამენტო ასამბლეის პრეზიდენტი, გიგი წერეთელი, აზერბაიჯანის პარლამენტის თავჯდომარეს, საჰიბა გაფაროვას, ტელეფონით ესაუბრა.

საუბრის ძირითადი თემა მთიანი ყარაბაღის კონფლიქტის ზონაში არსებული ვითარება იყო. გაფაროვას განცხადებით, 27 სეტქმბრიდან, სომხეთის შეიარაღებულმა ძალებმა განახორციელეს სამხედრო შეტევა მთლიანი ფრონტის ხაზზე, სადაც გამოყენებული იყო არტილერია და მსხვილკალიბრიანი იარაღი. მისივე განცხადებით, ეს არის საერთაშორისო სამართლის უხეში დარღვევა და აგრესიის ტოლფასია.

გაფაროვამ ასევე აღნიშნა, რომ საერთაშორისო თანამეგობრობა არაერთხელ იქნა გაფრთხილებული, რომ მოსალოდნელი იყო სამხედრო პროვოკაცია. მისივე განმარტებით, აზერბაიჯანის საპასუხო დარტყმის შედეგად აზერბაიჯანი აკონტროლებს სოფლებს ფიზულისა და ჯაბრაელის რაიონებში, რაც, მისივე განმარტებით, წარმოადგენს აზერბაიჯანის კუთვნილ ტერიტორიას.

როგორც გიგი წერეთელმა აღნიშნა, ძალიან სამწუხაროა ის ფაქტი, რომ ეს უკვე მეორე სამხედრო შეტაკებაა მოკლე პერიოდში.

"მთავარ ამოცანას წარმოადგენს სისხლისღვრის შეწყვეტა, რადგან უკვე დიდია მსხვერპლი სამხედრო და მშვიდობიან მოქალაქეებს შორის, აუცილებელია, რომ მხარეებმა აქტიურად ითანამშრომლონ ეუთოს მინსკის ჯგუფთან, რომელიც წარმოადგენს ძირითად მექანიზმს მშვიდობიანი მოლაპარაკებებისათვის და ომის გზით ტერიტორიული დავის გადაწყვეტა არ შეესაბამება ეუთოს პრინციპებს. ჩვენ არაერთხელ შევთავაზეთ ეუთოს პლატფორმა აღმასრულებელ და საპარლამენტო ლიდერებს იმისათვის, რომ ხელი შეგვეწყო პოზიციების დაახლოებასა და კონკრეტული სამოქმედო გეგმის შემუშავებას ყარაბაღის კონფლიქტის უსისხლოდ მოგვარებისთვის", — განაცხადა წერეთელმა.

გიგი წერეთლის თქმით, ასევე არსებობს მუდმივი კონტაქტი სომხურ მხარესთან და მათგან მოწოდებულია ოფიციალური ინფორმაცია მიმდინარე მოვლენებთან დაკავშირებით.

„სამწუხაროდ, ჯერ-ჯერობით პროგრესის ნაცვლად ჯერ კიდევ ომი გვაქვს ამ რეგიონში, ახლა უნდა ვიფიქროთ საომარი მოქმედებების სასწრაფოდ შეჩერებაზე და ყველა საერთაშორისო აქტორი უნდა ჩაერთოს აზერბაიჯანსა და სომხეთს შორის მოლაპარაკებების პროცესში.

რაც მთავარია, მოლაპარაკებები არ უნდა ნიშნავდეს ვინმეს მხრიდან დროის მოგებას, არამედ უნდა იყოს ორიოენტირებული კონკრეტულ შედეგებზე, საერთაშორსოდ აღიარებული სამართლის პრინციპებზე და ქვეყნების ტერიტორიული მთლიანობის პატივისცემაზე", — აცხადებს წერეთელი.

გიგი წერეთელსა და გაფაროვას შორის სატელეფონო საუბარს აზერბაიჯანული მედია
ავრცელებს.