გაეროს 75-ე გენერალურ ასამბლეაზე სიტყვით გამოსვლისას რუსეთის პრეზიდენტმა, ვლადიმერ პუტინმა კიბერუსაფრთხოების მნიშვნელობასა და საფრთხეებზე ისაუბრა და რეგულირების ინიციატივა გააჟღერა. პუტინის რიტორიკა მიმართული იყო იმისკენ, რომ ციფრული ტექნოლოგიების "უკონტროლო გავრცელება" საფრთხედ წარმოეჩინა.

მისი აზრით, ციფრული ტექნოლოგიების სფეროს რეგულირება გამართლებული იქნება, არამხოლოდ სამხედრო, არამედ "ტრადიციების, სამართლის, ადამიანური ურთიერთობის მორალის" თვალსაზრისით.

"როგორც ჩვეულებრივი იარაღი, ის [ციფრული ტექნოლოგიები] შეიძლება აღმოჩნდეს სხვადასხვა ტიპის რადიკალებისა და ექსტრემისტების ხელში და არამხოლოდ რეგიონალური კონფლიქტების ზონაში, არამედ, სხვა ქვეყნებშიც შექმნას დიდი რისკები.

ამ მიმართულებით კიბერუსაფრთხოებისა და წამყვანი ციფრული ტექნოლოგიების გამოყენების საკითხი იმსახურებს ყველაზე სერიოზულ განხილვას გაეროში. მნიშვნელოვანია, გავიგოთ და გავიაზროთ ხალხის შიში, რამდენად იქნება დაცული მათი უფლება პირად ცხოვრებაზე, უსაფრთხოებასა და საკუთრებაზე", — განაცხადა მან.

მისი მტკიცებით, აუცილებლად უნდა ისწავლონ, ახალი ტექნოლოგიების კაცობრიობის სასარგებლოდ გამოყენება და უნდა იპოვონ სწორი ბალანსი განვითარებისთვის ხელოვნური ინტელექტის გამოყენებასა და "გამართლებულ შემზღუდავ ზომებს" შორის.

რუსეთი არაერთმა სახელმწიფომ დაადანაშაულა კიბერთავდასხმაში. საერთაშორისო თანამეგობრობა და საგამოძიებო ორგანოები აცხადებენ, რომ რუსი ჰაკერები თავს ესხმიან სხვადასხვა ქვეყანას კრემლის ინტერესების შესაბამისად და მათ პოლიტიკურ პროცესებზე გავლენის მოპოვებას ცდილობენ. გარდა ამისა, ბოლო პერიოდში რუსეთი არაერთხელ დაადანაშაულეს სხვადასხვა ქვეყნის ჯანდაცვის სისტემაზე თავდასხმასა და ინფორმაციის მოპორავაში. მათ შორის, საქართველო არაერთხელ გახდა რუსული კიბერშეტევის მსხვერპლი. რამდენიმე თვის წინ რუსმა ჰაკერებმა საქართველოს ჯანდაცვის სისტემისა და ლუგარის ლაბორატორიის მონაცემები მოიპარეს.