საქართველოს ეროვნული ბანკის მაკროეკონომიკისა და სტატისტიკის დეპარტამენტის უფროსის, არჩილ იმნაიშვილის განცხადებით, როდესაც ლარის ასეთი გაუფასურება არ არის გამოწვეული ფუნდამენტური ფაქტორებით, მას, როგორც წესი, სწრაფი გამყარება მოჰყვება.

"ეს არაერთხელ გვინახავს საქართველოში, მათ შორის, წელსაც, მაისში, როდესაც მნიშვნელოვნად გაუფასურდა და შემდეგ ისევ სწრაფად გამყარდა", — განაცხადა იმნაიშვილმა რუსთავი 2-ის ეთერში.

გაცვლით კურსზე საუბრისას კი, იმნაიშვილმა აღნიშნა, რომ გამომდინარე იქიდან, საქართველოში მცურავი გაცვლითი კურსია, კურსს არა ეროვნული ბანკი და სავალუტო ინტერვენციები, არამედ საბაზრო ძალები — მოთხოვნა და მიწოდება განსაზღვრავს. მისივე განმარტებით, იმისდა მიხედვით, რა ვითარებაა ეკონომიკაში, ეს სავალუტო ბაზარზეც აისახება.